علیزے شاہ ، عینا آصف کی حمایت میں کھل کر سامنے آ گئیں
پاکستانی اداکارہ علیزے شاہ نے حال ہی میں اپنی ساتھی اداکارہ عینا آصف کے بیان کی بھرپور حمایت کی ہے۔
ایک نجی ٹی وی پروگرام میں گفتگو کرتے ہوئے عینا آصف نے انڈسٹری میں سینئر اداکاروں کے رویّوں پر بات کی۔ ان کا کہنا تھا کہ بڑے اسٹارز اکثر سیٹ پر نئے یا کم تجربہ کار فنکاروں کو معمولی باتوں پر تنقید کا نشانہ بناتے ہیں اور ان کی خامیاں نکالتے رہتے ہیں۔
انہوں نے مزید بتایا کہ بعض اوقات اگر وہ اپنی رائے دیں تو سینئر اداکار اس طرح ردِعمل دیتے ہیں جیسے کوئی بہت بڑی غلط بات کہہ دی گئی ہو، حالانکہ حقیقت میں ایسا نہیں ہوتا۔
عینا آصف کے مطابق، ایسے رویّوں کا مقصد نئے اداکاروں کو غیر آرام دہ محسوس کرانا ہوتا ہے۔ انہوں نے یہ بھی کہا کہ اہم مناظر کی شوٹنگ کے دوران بعض لوگ جان بوجھ کر باتیں شروع کر دیتے ہیں یا ایسی حرکات کرتے ہیں جس سے توجہ متاثر ہو۔
عینا آصف کا یہ بیان سوشل میڈیا پر تیزی سے وائرل ہوا، جس کے بعد علیزے شاہ نے بھی ان کی حمایت میں آواز اٹھائی۔ انہوں نے انسٹاگرام اسٹوری پر انٹرویو شیئر کرتے ہوئے عینا کو موجودہ دور کی باصلاحیت اور سمجھدار اداکارہ قرار دیا۔
علیزے شاہ نے کہا کہ عینا کی بات بالکل درست ہے اور افسوسناک طور پر یہ مسئلہ خاص طور پر کم عمر اداکاراؤں کے ساتھ پیش آتا ہے، بالخصوص ان کے ساتھ جن کا شوبز سے کوئی پس منظر نہیں ہوتا۔
انہوں نے آخر میں عینا آصف کی ہمت کو سراہتے ہوئے کہا کہ انہیں خوشی ہے کہ انہوں نے سب کے سامنے یہ مسئلہ اٹھایا۔
