پاکستان کی 76 فیصد نوجوان آبادی مستقبل کے حوالے سے پُرامید، ترقی کا انحصار نوجوانوں کی صلاحیتوں پر ہے: یو این ایف پی اے
پاکستان کی آبادی 25 کروڑ 72 لاکھ تک پہنچ گئی، ایک تہائی آبادی نوجوانوں پر مشتمل، ڈیجیٹل مہارتوں، بہتر تعلیم اور روزگار میں سرمایہ کاری پر زور
اسلام آباد: اقوام متحدہ کے ادارہ برائے آبادی (یو این ایف پی اے) نے عالمی یوم آبادی کے موقع پر جاری کردہ اپنی تازہ رپورٹ میں کہا ہے کہ پاکستان کی نوجوان آبادی ملک کا سب سے بڑا اثاثہ ہے اور اگر انہیں معیاری تعلیم، جدید مہارتیں، روزگار کے مساوی مواقع اور فیصلہ سازی میں مؤثر کردار فراہم کیا جائے تو یہی نوجوان پاکستان کی سماجی اور معاشی ترقی کی رفتار کو نمایاں طور پر تیز کر سکتے ہیں۔
رپورٹ کے مطابق پاکستان کی مجموعی آبادی تقریباً 25 کروڑ 72 لاکھ تک پہنچ چکی ہے، جبکہ ملک کی تقریباً ایک تہائی آبادی 10 سے 24 سال کی عمر کے نوجوانوں پر مشتمل ہے۔ یو این ایف پی اے کے مطابق یہ نوجوان آبادی پاکستان کے لیے ایک غیر معمولی "ڈیموگرافک ڈویڈنڈ” ثابت ہو سکتی ہے، بشرطیکہ ان کی تعلیم، صحت، ہنر مندی اور روزگار پر مؤثر سرمایہ کاری کی جائے۔
رپورٹ میں بتایا گیا ہے کہ پاکستان کے 76 فیصد نوجوان مستقبل کے بارے میں پُرامید ہیں اور وہ اپنی زندگی اور ملک کے بہتر مستقبل کی امید رکھتے ہیں۔ تاہم اس کے ساتھ ہی 53 فیصد نوجوان سکیورٹی خدشات، معاشی مشکلات، بے روزگاری، بڑھتی ہوئی مہنگائی، سماجی عدم مساوات اور محدود مواقع کے باعث تشویش کا شکار بھی ہیں، جو ان کی ترقی کی راہ میں اہم رکاوٹیں ہیں۔
یو این ایف پی اے کے مطابق دیہی علاقوں میں رہنے والے نوجوانوں کو شہری علاقوں کے مقابلے میں زیادہ مشکلات کا سامنا ہے۔ خاص طور پر انٹرنیٹ اور ڈیجیٹل سہولیات تک محدود رسائی کی وجہ سے دیہی نوجوان جدید تعلیم، آن لائن تربیت، ڈیجیٹل مہارتوں اور روزگار کے نئے مواقع سے پوری طرح فائدہ نہیں اٹھا پا رہے، جس سے شہری اور دیہی علاقوں کے درمیان ترقی کا فرق مزید بڑھنے کا خدشہ ہے۔
رپورٹ میں زور دیا گیا ہے کہ پاکستان میں نوجوانوں کو جدید تقاضوں سے ہم آہنگ ڈیجیٹل مہارتیں فراہم کرنا، انہیں باوقار اور پائیدار روزگار کے مواقع دینا، معیاری تعلیم اور صحت کی سہولیات تک رسائی یقینی بنانا اور انہیں قومی ترقی کے عمل میں فعال شریک بنانا وقت کی اہم ضرورت ہے۔
اقوام متحدہ کے ادارے نے واضح کیا کہ آبادی سے متعلق پالیسیوں کا مقصد صرف آبادی میں اضافہ یا کمی نہیں ہونا چاہیے بلکہ ہر فرد کو اپنے مستقبل، تعلیم، صحت، شادی، خاندان اور بچوں سے متعلق آزادانہ اور باخبر فیصلے کرنے کا حق دینا بھی اتنا ہی ضروری ہے۔ رپورٹ میں کہا گیا ہے کہ آبادی کی پالیسی بنیادی طور پر انسانی حقوق، مساوی مواقع اور آزادانہ انتخاب کا معاملہ ہے، نہ کہ صرف اعداد و شمار کا۔
یو این ایف پی اے نے اپنی سفارشات میں حکومت، نجی شعبے، تعلیمی اداروں اور ترقیاتی شراکت داروں پر زور دیا کہ وہ نوجوانوں کی صلاحیتوں سے بھرپور استفادہ کرنے کے لیے مشترکہ حکمت عملی اختیار کریں۔ رپورٹ کے مطابق اگر نوجوانوں کی تعلیم، ہنر، صحت، ڈیجیٹل رسائی اور روزگار میں بروقت سرمایہ کاری کی گئی تو پاکستان نہ صرف اپنی معاشی ترقی کو تیز کر سکتا ہے بلکہ پائیدار ترقی کے اہداف (SDGs) کے حصول میں بھی نمایاں کامیابی حاصل کر سکتا ہے۔
