اینڈی برنہم برطانیہ کے نئے وزیراعظم منتخب، مہنگائی، معیشت، رہائش اور تعلیم میں بڑے اصلاحاتی پیکج کا اعلان
برطانیہ کو ایک بار پھر سیاسی اور معاشی استحکام کی راہ پر گامزن کرنا وقت کی اہم ترین ضرورت ہے
لندن: برطانیہ کے نئے وزیراعظم اینڈی برنہم نے منصب سنبھالتے ہی مہنگائی، عوامی خدمات، رہائش، تعلیم اور معیشت میں وسیع اصلاحات کا اعلان کرتے ہوئے ملک کو ایک نئے سیاسی اور معاشی ماڈل کی جانب لے جانے کے عزم کا اظہار کیا ہے۔ انہوں نے کہا کہ ان کی حکومت کا مقصد عوام کا ریاست پر اعتماد بحال کرنا، سیاسی استحکام کو مضبوط بنانا اور برطانیہ کو معاشی طور پر دوبارہ مستحکم کرنا ہے۔
اینڈی برنہم گزشتہ ایک دہائی کے دوران برطانیہ کے ساتویں وزیراعظم بن گئے ہیں۔ انہوں نے کیئر اسٹارمر کی جگہ وزارتِ عظمیٰ کا منصب سنبھالا، جنہوں نے واضح پارلیمانی اکثریت حاصل کرنے کے صرف دو برس بعد اپنے عہدے سے استعفیٰ دے دیا تھا۔
اینڈی برنہم جمعے کے روز بغیر کسی مقابلے کے حکمران لیبر پارٹی کے قائد منتخب ہوئے۔ کیئر اسٹارمر نے مختصر الوداعی خطاب کے بعد شاہ چارلس سوم سے ملاقات کر کے اپنا استعفیٰ پیش کیا، جس کے بعد بادشاہ نے اینڈی برنہم کو حکومت بنانے کی دعوت دی۔ دعوت قبول کرتے ہی اینڈی برنہم نے باضابطہ طور پر وزارتِ عظمیٰ کا حلف اٹھایا اور ڈاؤننگ اسٹریٹ منتقل ہو گئے۔
ڈاؤننگ اسٹریٹ پہنچنے پر حکومتی ارکان اور عملے نے نئے وزیراعظم کا پرتپاک استقبال کیا۔ اس موقع پر قوم سے اپنے پہلے خطاب میں اینڈی برنہم نے کہا کہ ان کی تقرری محض حکومت کی تبدیلی نہیں بلکہ برطانیہ کے لیے "نئے عزم، نئی سمت اور نئی شروعات” کا آغاز ہے۔
انہوں نے کہا کہ برطانیہ کو ایک بار پھر سیاسی اور معاشی استحکام کی راہ پر گامزن کرنا وقت کی اہم ترین ضرورت ہے۔ ان کے بقول عوام سیاست سے بددل ہو چکے ہیں اور اب سیاست کو الزام تراشی کے بجائے مسائل کے عملی حل کا ذریعہ بنانا ہوگا۔
نئے وزیراعظم نے اعلان کیا کہ ان کی حکومت اختیارات کو ویسٹ منسٹر سے مقامی حکومتوں تک منتقل کرے گی تاکہ ملک کے تمام علاقوں کو فیصلہ سازی میں زیادہ مؤثر کردار مل سکے اور علاقائی ترقی کو فروغ دیا جا سکے۔
اینڈی برنہم نے کہا کہ حکومت برطانیہ کے لیے ایک نیا معاشی ماڈل متعارف کرائے گی، جس کے تحت بنیادی ضروریات سے متعلق اہم شعبوں پر عوامی کنٹرول کو مضبوط بنایا جائے گا، ملکی صنعت کو فروغ دیا جائے گا اور صنعتی ترقی کے نئے دور کا آغاز کیا جائے گا۔
انہوں نے بتایا کہ رواں سال کے دوران ایک جامع 10 سالہ قومی ترقیاتی منصوبہ پیش کیا جائے گا، جس میں معیشت، روزگار، انفراسٹرکچر، تعلیم، صحت اور علاقائی ترقی کے اہداف اور حکمت عملی واضح کی جائے گی۔
مہنگائی اور بڑھتی ہوئی لاگتِ زندگی کو اپنی حکومت کا فوری چیلنج قرار دیتے ہوئے وزیراعظم نے کہا کہ عوام کو ریلیف فراہم کرنے کے لیے عملی اقدامات کا آغاز آئندہ روز سے کیا جائے گا، جبکہ ان منصوبوں کے لیے مالی وسائل کی فراہمی کا مکمل خاکہ بھی جلد پیش کیا جائے گا۔
تعلیم کے شعبے میں اصلاحات کا اعلان کرتے ہوئے اینڈی برنہم نے کہا کہ نوجوانوں کو جدید مہارتیں فراہم کر کے روزگار کے بہتر مواقع پیدا کیے جائیں گے۔ انہوں نے ذہنی صحت سمیت مختلف سماجی شعبوں میں اضافی سرمایہ کاری اور معاونت کا بھی اعلان کیا۔
رہائشی بحران کے حل کو اپنی حکومت کی اولین ترجیحات میں شامل کرتے ہوئے انہوں نے مزید کونسل ہاؤسز تعمیر کرنے کا وعدہ کیا تاکہ کم آمدنی والے خاندانوں کو سستی رہائش فراہم کی جا سکے اور طویل مدت میں فلاحی اخراجات میں بھی کمی لائی جا سکے۔
انہوں نے کہا کہ حکومت کی ابتدائی ہدایات میں ملک سے بے گھر افراد کے مسئلے کے خاتمے کے لیے فوری اور مؤثر اقدامات بھی شامل ہوں گے، تاکہ ہر شہری کو محفوظ رہائش میسر آ سکے۔
اپنے خطاب کے اختتام پر اینڈی برنہم نے کہا کہ عوام کی خدمت ان کی حکومت کی اولین ترجیح ہوگی۔ انہوں نے عزم ظاہر کیا کہ وہ اپنی تمام تر توانائیاں برطانیہ کی ترقی، قومی اتحاد، معاشی بحالی اور عوام کا اعتماد بحال کرنے کے لیے وقف کریں گے۔
بعد ازاں اینڈی برنہم اپنی اہلیہ میری فرانس کے ہمراہ 10 ڈاؤننگ اسٹریٹ کے اندر گئے، جہاں انہوں نے وزیراعظم ہاؤس کے عملے سے ملاقات کی۔ وزارتِ عظمیٰ سنبھالنے کے بعد ان کی پہلی بڑی آئینی ذمہ داری نئی کابینہ کی تشکیل ہوگی، جس کے لیے مشاورت کا عمل فوری طور پر شروع کیے جانے کا امکان ہے۔
