اسلام آ باد (نیوز پلس)وزیراعظم عمران خان نے اقوام متحدہ میں پاکستان کی مستقل مندوب ملیحہ لودھی کو ہٹانے اور ان کی جگہ سابق سفیر منیراکرم کی تعیناتی کی با ضابطہ منظوری دے دی۔وزارت خارجہ نے اقوام متحدہ سمیت دیگر ممالک میں سفیروں کی بڑے پیمانے پر تقرریاں اور تبادلے کیے ہیں جس کی منظوری وزیراعظم عمران خان نے دے دی ہے۔دفترخارجہ میں تعینات ایڈیشنل سیکریٹری محمد اعجاز کو ہنگری میں پاکستان کا سفیر مقرر کردیا گیا، دفتر خارجہ میں ڈائریکٹر جنرل (اقوام متحدہ میں) کے طور پر تعینات خلیل احمد ہاشمی کو جنیوا میں پاکستان کا مستقل مندوب تعینات کردیا گیا اوردفترخارجہ کے مطابق شمالی کوریا میں پاکستان کے ناظم الامور سید سجاد حیدر کو کویت میں پاکستان کا سفیر مقرر کردیا گیا ہے۔