چینی صدر اور وزیراعظم پاکستان کے درمیان اہم ملاقات، شی جن کی مشرق وسطیٰ میں قیام امن کیلئے پاکستان کے کردار کی تعریف
کہ چین پاکستان کے ان اقدامات کو قدر کی نگاہ سے دیکھتا ہے، خصوصاً علاقائی امن کے لیے کی جانے والی سفارتی کوششیں اہم ہیں۔
بیجنگ میں چین اور پاکستان کی اعلیٰ قیادت کے درمیان اہم ملاقاتیں ہوئیں جن میں دوطرفہ تعلقات، علاقائی امن اور مختلف شعبوں میں تعاون کو مزید مضبوط بنانے پر زور دیا گیا۔
چینی صدر شی جن پنگ نے وزیراعظم پاکستان شہباز شریف سے ملاقات کے دوران کہا کہ چین اپنی ہمسایہ سفارت کاری میں پاکستان کے ساتھ تعلقات کو ہمیشہ اولین ترجیح دیتا ہے۔ انہوں نے اس بات پر زور دیا کہ دونوں ممالک کے درمیان تعلقات “ناقابلِ شکست روایتی دوستی” کی حیثیت رکھتے ہیں جو وقت کے ساتھ مزید مضبوط ہوئی ہے۔
صدر شی جن پنگ نے مشرق وسطیٰ میں امن کے قیام کے لیے پاکستان کے کردار کو سراہتے ہوئے کہا کہ پاکستان نے خطے میں کشیدگی کم کرنے اور ثالثی کی کوششوں میں مثبت کردار ادا کیا ہے، جو قابلِ تعریف ہے۔ انہوں نے یہ بھی کہا کہ چین پاکستان کے ان اقدامات کو قدر کی نگاہ سے دیکھتا ہے، خصوصاً علاقائی امن کے لیے کی جانے والی سفارتی کوششیں اہم ہیں۔
ملاقات کے دوران چینی صدر نے فیلڈ مارشل عاصم منیر کو بھی خوش آمدید کہا اور ان کی حالیہ علاقائی سفارتی سرگرمیوں کا ذکر کرتے ہوئے کہا کہ ایران سے واپسی کے بعد امن کے لیے ان کی کوششیں اور ثالثی کے اقدامات قابلِ تعریف ہیں۔
صدر شی جن پنگ نے مزید کہا کہ چین اور پاکستان کو مشترکہ طور پر یکطرفہ اقدامات اور “سرد جنگ” کی ذہنیت کی مخالفت کرنی چاہیے۔ انہوں نے دونوں ممالک کے درمیان اعلیٰ سطحی روابط اور سکیورٹی تعاون کو مزید وسعت دینے کی ضرورت پر بھی زور دیا۔
اس سے قبل وزیراعظم پاکستان شہباز شریف نے چینی وزیراعظم لی چیانگ سے بھی ملاقات کی، جس میں دونوں ممالک نے پاک چین شراکت داری کو ایک نئے مرحلے میں داخل کرنے پر اتفاق کیا۔ اس نئے مرحلے میں تعاون کو زیادہ جدید، مؤثر اور وسیع بنانے کا عزم ظاہر کیا گیا۔
اس ملاقات کے دوران مختلف شعبوں میں تعاون بڑھانے کے لیے 15 مفاہمتی یادداشتوں (MoUs) پر دستخط کیے گئے۔ ان میں سرمایہ کاری، زراعت، موسمیاتی تبدیلی اور تعلیم جیسے اہم شعبے شامل ہیں، جن کا مقصد دونوں ممالک کے درمیان اقتصادی اور ترقیاتی تعاون کو مزید گہرا کرنا ہے۔
وزیراعظم شہباز شریف نے اس موقع پر کہا کہ پاک چین دوستی پاکستان کی خارجہ پالیسی کا بنیادی ستون ہے۔ انہوں نے کہا کہ دونوں ممالک کا تعلق صرف سفارتی نہیں بلکہ اسٹریٹجک تعاون، ترقی اور مشترکہ خوشحالی کے مضبوط عزم پر مبنی ہے، جو وقت کے ساتھ مزید مستحکم ہوا ہے۔!
