فیلڈ مارشل عاصم منیر سے کینیڈین وزیر خارجہ انیتا آنند کی ملاقات، دہشت گردی کے خلاف تعاون مزید مضبوط بنانے پر اتفاق
جی ایچ کیو راولپنڈی میں ہونے والی ملاقات میں علاقائی سلامتی، دوطرفہ تعلقات، دفاعی تعاون اور عالمی امن سے متعلق امور پر تفصیلی تبادلہ خیال
راولپنڈی: کینیڈا کی وزیر خارجہ انیتا آنند نے جنرل ہیڈکوارٹرز (جی ایچ کیو) راولپنڈی میں فیلڈ مارشل سید عاصم منیر سے ملاقات کی، جس میں پاکستان اور کینیڈا کے دوطرفہ تعلقات، علاقائی سلامتی، دفاعی تعاون اور باہمی دلچسپی کے دیگر اہم امور پر تفصیلی تبادلہ خیال کیا گیا۔
پاک فوج کے شعبۂ تعلقات عامہ (آئی ایس پی آر) کے مطابق ملاقات میں فیلڈ مارشل سید عاصم منیر نے عالمی امن اور خطے کے استحکام کے لیے پاکستان کے اصولی مؤقف کو اجاگر کرتے ہوئے کہا کہ موجودہ سکیورٹی چیلنجز سے مؤثر انداز میں نمٹنے کے لیے مشترکہ تعاون، قریبی روابط اور مربوط حکمت عملی ناگزیر ہے۔
آئی ایس پی آر کے مطابق فیلڈ مارشل نے دہشت گردی سمیت مشترکہ خطرات کے خلاف پاکستان اور کینیڈا کے درمیان تعاون کو مزید وسعت دینے کی ضرورت پر زور دیا اور کہا کہ دونوں ممالک کے درمیان سکیورٹی تعاون علاقائی امن و استحکام کے لیے اہم کردار ادا کر سکتا ہے۔
اس موقع پر کینیڈا کی وزیر خارجہ انیتا آنند نے دہشت گردی کے خلاف جنگ میں پاکستان کی مسلسل کوششوں، قربانیوں اور مؤثر کردار کو سراہتے ہوئے خطے میں امن و استحکام کے فروغ کے لیے پاکستان کی تعمیری کاوشوں کی بھی تعریف کی۔
آئی ایس پی آر کے مطابق ملاقات میں دونوں رہنماؤں نے پاکستان اور کینیڈا کے درمیان دوطرفہ تعلقات کو مزید مستحکم بنانے، دفاعی تعاون میں اضافے اور سکیورٹی کے شعبے میں روابط کو فروغ دینے کے عزم کا اعادہ کیا۔
بیان کے مطابق یہ ملاقات دونوں ممالک کے درمیان باہمی اعتماد، تعاون اور شراکت داری کو مزید مضبوط بنانے کے ساتھ ساتھ علاقائی امن اور مشترکہ سکیورٹی اہداف کے حصول کی جانب ایک اہم پیش رفت قرار دی جا رہی ہے۔
