فیض حمید کو ان کے جرائم کی حقیقی سزا نہیں ملی، ایمل ولی خان
چائے کا کپ پکڑ کر کابل میں 40ہزار دہشتگردوں کو منظم کرنے والا آج بھی بے حساب ہے
۔ایمل ولی خان نے کہاکہ خیبرپختونخوا میں اسٹیبلشمنٹ کی تیسری بار کی گئی انجینئرنگ نے صوبہ تباہ کیا، جب تک پورے گٹھ جوڑ کا احتساب نہیں ہوتا
پشاور:(نیوز پلس) عوامی نیشنل پارٹی کے صدر سینیٹر ایمل ولی خان نے کہا ہے کہ سابق لیفٹیننٹ جنرل فیض حمید کو ان کے جرائم پر حقیقی سزا نہیں ملی ہے اور پختونوں کی دوبارہ نسل کشی کی کوشش پر بھی ان سے بازپرس نہیں ہوئی۔سینیٹر ایمل ولی خان نے فیض حمید کی سزا پر ردعمل دیتے ہوئے کہا کہ جنرل (ر)فیض حمید کو ان کے جرائم کی حقیقی سزا نہیں ملی، چائے کا کپ پکڑ کر کابل میں 40ہزار دہشت گردوں کو منظم کرنے والا آج بھی بے حساب ہے۔
انہوں نے کہا کہ پختونوں کی دوبارہ نسل کشی کی کوشش پر بھی فیض سے بازپرس نہیں ہوئی، فیض،باجوہ،عمران گٹھ جوڑ کے سارے ”فیض یاب“آج بھی اقتدار کے مزے لوٹ رہے ہیں۔ایمل ولی خان نے کہا کہ پوری ایک نسل کو اپنے سیاسی مشران کا دشمن بنایا گیا، قوم کو بتایا گیا کہ آپ کے سارے مشران چور ہیں اور صرف ایک مسیحا ہے جبکہ وفاق اور پنجاب نے تبدیلی 4سال انجوائے کی اور سب سے زیادہ نقصان پختونوں نے اٹھایا ہے۔انہوں نے کہاکہ خیبرپختونخوا میں اسٹیبلشمنٹ کی تیسری بار کی گئی انجینئرنگ نے صوبہ تباہ کیا، جب تک پورے گٹھ جوڑ کا احتساب نہیں ہوتا، امن اور انصاف ممکن نہیں ہے۔ایمل ولی خان نے مطالبہ کیا کہ پختونوں کے خلاف سازشیں بے نقاب کیے بغیر حالات درست نہیں ہوں گے۔
