پنجاب میں شدید طوفان اور بارش سے تباہی ، مختلف حادثات میں 7 شہری جاں بحق ، 41 زخمی
راولپنڈی میں 1،جہلم میں 3 ، شیخوپوری ، ننکانہ صاحب اور سیال کوٹ میں 1-1 شہری جاں بحق ہوا، این ڈی ایم اے
راولپنڈی: پنجاب بھر میں ہونے والی طوفانی بارشوں کے نتیجے میں 7 شہری جاں بحق جبکہ 41 زخمی ہوئے ہیں۔
صوبائی ڈیزاسٹر مینجمنٹ اتھارٹی (پی ڈی ایم اے) نے ہفتے کے روز صوبہ بھر میں طوفان کے باعث نقصانات بارے ابتدائی رپورٹ جاری کردی۔
رپورٹ کے مطابق آندھی و طوفان کے باعث پیش آنے والے حادثات میں7 شہری جاں بحق اور 41 زخمی ہوئے۔ راولپنڈی میں 1، جہلم میں 3، شیخوپورہ، ننکانہ صاحب، اور سیالکوٹ میں 1، 1 شہری جانبحق ہوا۔
پی ڈی ایم اے کا کہنا ہے کہ اموات بوسیدہ مکانات کے گرنے اور غیر محفوظ مقامات پر ہونے کے باعث ہوئیں۔ طوفان کے باعث متعدد کچے اور بوسیدہ مکانات کو بھی نقصان پہنچا۔
دوسری جانب ریلیف کمشنر پنجاب نبیل جاوید کی زخمیوں کو بہترین طبی امداد فراہم کرنے کی ہدایت کرتے ہوئے صوبے بھر کے کمشنرز،ڈپٹی کمشنرز اور ریسکیو اداروں کو الرٹ رہنے کی ہدایت کردی۔
ریلیف کمشنر پنجاب نبیل جاوید نے زخمیوں کو بہترین طبی امداد فراہم کرنے کی ہدایت کی ہے اور انہوں نے صوبہ بھر کے کمشنرز، ڈپٹی کمشنرز اور ریسکیو اداروں کو ہائی الرٹ رہنے کے احکامات جاری کیے ہیں۔
ڈی جی پی ڈی ایم اے عرفان علی کاٹھیا نے کہا کہ حکومت پنجاب کی پالیسی کے مطابق متاثرہ خاندانوں کو مالی معاونت فراہم کی جائے گی۔
عرفان علی کاٹھیا نے بتایا کہ کنٹرول روم صورتحال کی مسلسل نگرانی کر رہا ہے۔
انہوں نے شہریوں سے اپیل کی کہ وہ خراب موسم کے الرٹس پر عمل کرتے ہوئے غیر ضروری سفر سے گریز کریں، بجلی کے کھمبوں اور لٹکتی تاروں سے دور رہیں، اور آسمانی بجلی سے بچاؤ کے لیے محفوظ مقامات پر پناہ لیں۔
انہوں نے مزید ہدایت کی گرج چمک اور طوفانی صورتحال میں کھلے آسماں تلے ہر گز نہ جائیں۔
