Newspulse - نیوز پلس
پاکستان، سیاست، کھیل، بزنس، تفریح، تعلیم، صحت، طرز زندگی ... کے بارے میں تازہ ترین خبریں

نام نہاد دوستی کے لبادے میں چھپے دشمن کو شکست کا سامنا کرنا پڑے گا، آرمی چیف

نام نہاد دوستی کے لبادے میں چھپے دشمن کو شکست کا سامنا کرنا پڑے گا، آرمی چیف  

غیر ملکی آقاؤں کیلئے دہشت گردی کے آلہ کار بنے عناصر کادھوکا دہی اور منافقت کا کھیل کسی صورت قبول نہیں،آرمی چیف  کا دورہ بلوچستان، شہداء کی نماز جنازہ میں شرکت، زیر علاج زخمیوں کی عیادت

راولپنڈی:  چیف آف آرمی سٹاف جنرل عاصم منیر نے بلوچستان میں دہشت گردوں کے حملوں میں شہید و زخمی ہونیوالے اہلکاروں کو خراج تحسین پیش کرتے ہوئے کہا ہے کہ نام نہاد دوستی کے لبادے میں چھپے دشمن کو بہادر قوم اور مسلح افواج سے شکست کا سامنا کرنا پڑے گا،غیر ملکی آقاؤں کیلئے دہشت گردی کا آلہ کار بنے عناصرکا  دہرا معیار اختیار کر کے دھوکہ دہی اور منافقت کا کھیل کسی صورت قبول نہیں۔

آرمی چیف
آرمی چیف کا دورہ بلوچستان- زیر علاج زخمیوں کی عیادت

 

آئی ایس پی آر کے مطابق ہفتے کو چیف آف آرمی سٹاف جنرل عاصم منیر نے بلوچستان کا دورہ کیا جہاں انہیں بلوچستان کی سیکیورٹی کی صورت حال پر بریفنگ دی گئی اور اس موقع پر سینئر سیکیورٹی اور انٹلیجنس عہدیدار بھی موجود تھے۔

آئی ایس پی آر کے مطابق چیف آف آرمی سٹاف جنرل عاصم منیر، گورنر جعفر خان مندوخیل اور وزیراعلی بلوچستان سرفراز بگٹی نے شہدا کی نماز جنازہ میں شرکت کی اور کمبائنڈ ملٹری ہسپتال کوئٹہ میں زیر علاج زخمیوں کی عیادت بھی کی۔آرمی چیف، گورنر اور وزیراعلی نے شہدا اور زخمیوں کو ہر قیمت پر ملک کے دفاع کے لیے غیرمتزلزل عزم پر انہیں خراج تحسین پیش کیا۔

آرمی چیف نے کہا کہ وہ عناصر جو غیر ملکی آقاؤں کیلئے دہشت گردی کے آلہ کار بنے ہوئے ہیں اور دہرا معیار اختیار کر کے دھوکا دہی اور منافقت کا کھیل کھیل رہے ہیں، وہ ہمارے لئے کسی صورت قابل قبول نہیں ہیں۔انہوں نے کہا کہ نام نہاددوستی کے لبادے میں چھپے دشمن چاہے کچھ بھی کر لیں انہیں ہماری بہادر قوم اور مسلح افواج کی مزاحمت کے سامنے شکست کا سامنا کرنا پڑے گا۔

آرمی چیف کا شہداء کا نماز جنازہ میں شرکت
آرمی چیف شہدا کا نماز جنازہ ادا کر رہے ہیں

 

انہوں نے کہا کہ انشا اللہ مادر وطن اور اس کے عوام کے تحفظ کے لیے ہم ہرممکن جوابی کارروائی کریں گے اور  دشمنوں کو ان کے انجام تک پہنچائیں گے۔

آئی ایس پی آر کے مطابق آرمی چیف نے پاک فوج، فرنٹیئر کور(ایف سی) اور قانون نافذ کرنے والے اداروں کے افسران اور جوانوں کی بہادری اور دہشت گردی کے خلاف عزم کو سراہا۔اس موقع پر آرمی چیف نے بلوچستان کے عوام کی سلامتی اور فلاح و بہبود یقینی بنانے، صوبے میں امن، استحکام اور ترقی کے فروغ کیلئے صوبائی حکومت کے ساتھ مکمل تعاون جاری رکھنے کے عزم کا اعادہ کیا۔

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More