ماہ نور مرزا کا اداکار علی رضا پر تعلقات اور بے وفائی کا الزام
معروف انفلوئنسر نے پوڈ کاسٹ میں بتایا کہ وہ اور علی رضا تقریباً 5 ماہ تک قریبی تعلق میں رہے
پاکستانی شوبز انڈسٹری کے ابھرتے ہوئے اداکار علی رضا ایک نئے تنازعے میں الجھ گئے ہیں، جب سوشل میڈیا انفلوئنسر ماہ نور مرزا نے ان کے ساتھ مبینہ تعلقات کے حوالے سے حیران کن دعوے کیے ہیں۔ یہ معاملہ سامنے آنے کے بعد سوشل میڈیا پر کافی توجہ کا مرکز بن گیا ہے۔
ماہ نور مرزا نے ایک نجی پوڈکاسٹ میں بتایا کہ وہ اور علی رضا تقریباً پانچ ماہ تک قریبی تعلق میں رہے۔ ان کا کہنا تھا کہ یہ رشتہ سوشل میڈیا پر بات چیت سے شروع ہوا اور بعد میں ذاتی ملاقاتوں اور مشترکہ تقریبات تک پہنچ گیا۔ انہوں نے کہا کہ اس دوران دونوں مسلسل رابطے میں رہے اور اکثر ایونٹس میں ایک ساتھ نظر آتے تھے۔
ماہ نور کے مطابق، یہ وہ وقت تھا جب علی رضا ایک ڈرامہ پروجیکٹ میں مصروف تھے اور ان کا رویہ انتہائی خوشگوار اور دوستانہ تھا۔ ماہ نور نے کہا کہ ابتدائی طور پر انہیں اداکار ایک بہترین انسان لگتے تھے، لیکن حالات اچانک بدل گئے۔
ان کا الزام ہے کہ علی رضا کو جب شہرت حاصل ہوئی تو ان کے رویے میں واضح تبدیلی آئی۔ ماہ نور کے بقول، اداکار نے اچانک رابطہ ختم کر دیا اور پیغامات کا جواب دینا بھی بند کر دیا، جس سے وہ حیران رہ گئیں۔
ماہ نور نے مزید کہا کہ اس وقت علی رضا غیر شادی شدہ تھے اور ابتدا میں رویہ بہت اچھا تھا، مگر بعد میں سب کچھ بدل گیا۔ انہوں نے یہ بھی عندیہ دیا کہ ممکن ہے اداکار اب کسی اور کے ساتھ تعلق میں ہوں، خاص طور پر ایک ایسی شخصیت کے ساتھ جس کے ساتھ ان کی آن اسکرین جوڑی کو مداح بہت پسند کر رہے ہیں۔
اس معاملے کے سامنے آنے کے بعد سوشل میڈیا پر مختلف آراء سامنے آ رہی ہیں، جہاں کچھ صارفین ماہ نور کے دعووں پر سوال اٹھا رہے ہیں جبکہ کچھ اس معاملے پر علی رضا کی وضاحت کا مطالبہ کر رہے ہیں۔
