سیکیورٹی فورسز نے خیبرپختونخوا میں آپریشنز میں 10 خارجی دہشت گرد ہلاک کر دئیے
قوم دہشت گردی کے خلاف جنگ میں سیکیورٹی فورسز کے شانہ بشانہ کھڑی ہے، فورسز نے دہشت گردوں کے خلاف نمایاں کامیابیاں سمیٹی ہیں، آئی ایس پی آر
اسلام آباد: سیکیورٹی فورسز نے خیبرپختونخوا کے مختلف اضلاع میں کارروائیاں کرتے ہوئے 10 خارجی دہشت گردوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق خوارج کی موجودگی کی اطلاع پر سیکیورٹی فورسز نے ڈیرہ اسمٰعیل خان کے علاقے کھلاچی میں انٹیلی جنس کی بنیاد پر آپریشن کیا، آپریشن کے دوران فورسز نے خوارج کے ٹھکانے پر مؤثر طریقے سے کارروائی کی گئی، جس کے نتیجے میں 4 خوارج مارے گئے۔
آئی ایس پی آر نے بتایا کہ شمالی وزیرستان کے علاقوں دتہ خیل، حسن خیل، غلام خان اور میر علی میں چار مختلف کارروائیوں میں سیکیورٹی فورسز اور خارجی دہشت گردوں کے درمیان فائرنگ کا تبادلہ ہوا، جس کے نتیجے میں 6 خوارج کو ہلاک کر دیا گیا۔
آئی ایس پی آر کے مطابق مارے گئے خوارج کے قبضے سے اسلحہ اور گولہ بارود بھی برآمد ہوا ہے۔وزیرداخلہ محسن نقوی نے دہشت گردوں کے خلاف کامیاب آپریشنز پر سیکیورٹی فورسز کو خراج تحسین پیش کیا، پاکستان کی بہادر سیکیورٹی فورسز نے ایک بار پھر کامیاب آپریشنز کرکے خارجی دہشتگردوں کے ناپاک عزائم کو خاک میں ملایا۔
وزیر داخلہ نے کہا کہ سیکیورٹی فورسز نے بروقت آپریشنز کرکے 10 خارجی دہشت گردوں کو عبرتناک انجام تک پہنچایا، سیکیورٹی فورسز کو شاباش دیتے ہیں۔
محسن نقوی نے کہا کہ خیبرپختونخوا میں قیام امن کے لیے سیکیورٹی فورسز کے اقدامات لائق تحسین ہیں، خارجی دہشت گرد دھرتی کا بوجھ ہیں اور قوم کی حمایت سے ان کا مکمل خاتمہ کریں گے۔
انہوں نے کہا کہ قوم دہشت گردی کے خلاف جنگ میں سیکیورٹی فورسز کے شانہ بشانہ کھڑی ہے، فورسز نے دہشت گردوں کے خلاف نمایاں کامیابیاں سمیٹی ہیں
صدر مملکت آصٖف علی زرداری نے مختلف کارروائیوں کے دوران 10 دہشت گردوں کو جہنم واصل کرنے پر سکیورٹی فورسز کو خراج تحسین کرتے ہوئے کہنا تھا کہ سیکیورٹی فورسز دہشت گردی کے عفریت کے خاتمے کے لیے کارروائیاں کر رہی ہیں، پوری قوم دہشت گردی کے خلاف متحد ہے ،
وزیراعظم محمد شہباز شریف نے کولاچی، ضلع ڈیرہ اسماعیل خان اور ضلع وزیرستان میں فتنتہ الخوارج کے دہشت گردوں کے خلاف مختلف کامیاب کارروائی پر سیکیورٹی فورسز کی ستائش کی۔
وزیرداخلہ محسن نقوی نے خیبرپختونخوا کے مختلف علاقوں میں خوارجی دہشتگردوں کے خلاف کامیاب آپریشنز پر سکیورٹی فورسز کو خراج تحسین کہا کہ پاکستان کی بہادر سکیورٹی فورسز نے ایک بار پھر کامیاب آپریشنز کرکے خوارجی دہشتگردوں کے ناپاک عزائم کو خاک میں ملایا ۔
