امریکا سے معاہدے کو حتمی شکل دینے کیلئے پاکستان کے ذریعے مذاکرات جاری ہیں، ایران
اقوامِ متحدہ میں ایران کے مستقل مندوب امیر سعید ایروانی نے انکشاف کیا ہے کہ ایران اور امریکا کے درمیان ممکنہ معاہدے کو حتمی شکل دینے کے لیے سفارتی رابطے اور مذاکرات جاری ہیں، جن میں پاکستان اہم ثالثی کردار ادا کر رہا ہے۔
ایران کی سرکاری خبر رساں ایجنسی کے مطابق یہ بیان پیر کے روز اقوامِ متحدہ کی سلامتی کونسل کے اس اجلاس کے بعد سامنے آیا جو افغانستان کی صورتحال پر منعقد کیا گیا تھا۔ اجلاس کے اختتام پر میڈیا سے گفتگو کرتے ہوئے ایرانی سفیر امیر سعید ایروانی نے کہا کہ تہران اور واشنگٹن کے درمیان مختلف امور پر خیالات کا تبادلہ بدستور جاری ہے اور دونوں فریق ایک قابلِ قبول معاہدے تک پہنچنے کی کوشش کر رہے ہیں۔
ایرانی سفیر نے بتایا کہ پاکستان اس سفارتی عمل میں رابطے کے ایک اہم ذریعے کے طور پر کردار ادا کر رہا ہے۔ ان کے مطابق ایران اور امریکا اپنی تجاویز، آرا اور مختلف نکات پاکستان کے ذریعے ایک دوسرے تک پہنچا رہے ہیں تاکہ کسی مشترکہ اور حتمی مسودے پر اتفاقِ رائے پیدا کیا جا سکے۔
انہوں نے کہا کہ اگرچہ ابھی تک دونوں ممالک کسی حتمی معاہدے یا مکمل مسودے تک نہیں پہنچ سکے، تاہم مذاکراتی عمل تعطل کا شکار نہیں ہوا اور بات چیت مسلسل جاری ہے۔ امیر سعید ایروانی نے اس امید کا اظہار بھی کیا کہ جاری سفارتی کوششیں مستقبل میں مثبت نتائج دے سکتی ہیں۔
ماہرین کے مطابق ایران اور امریکا کے درمیان براہِ راست مذاکرات میں پیچیدگیوں کے باعث اکثر تیسرے ممالک سفارتی پل کا کردار ادا کرتے رہے ہیں، اور اس بار پاکستان کا نام سامنے آنا خطے میں اس کے بڑھتے ہوئے سفارتی کردار کی نشاندہی کرتا ہے۔
یہ پیش رفت ایسے وقت میں سامنے آئی ہے جب مشرقِ وسطیٰ اور خطے کی مجموعی صورتحال عالمی توجہ کا مرکز بنی ہوئی ہے، جبکہ ایران اور امریکا کے تعلقات کئی برسوں سے کشیدگی، پابندیوں اور جوہری پروگرام سے متعلق اختلافات کے باعث تناؤ کا شکار رہے ہیں۔
