آرمی چیف فیلڈ مارشل عاصم منیر کی ایرانی مسلح افواج کے چیف میجر جنرل محمد باقری سے اہم ملاقات
آرمی چیف فیلڈ مارشل سید عاصم منیر نے جنرل اسٹاف ہیڈ کوارٹرز، تہران، اسلامی جمہوریہ ایران کا دورہ کیا۔
آرمی چیف نے ایرانی مسلح افواج کے چیف آف جنرل اسٹاف میجر جنرل محمد باقری سے ملاقات کی۔ دونوں فوجی رہنماؤں نے دوطرفہ دفاعی تعلقات کو مضبوط بنانے پر خصوصی توجہ مرکوز کرتے ہوئے علاقائی سلامتی کے منظر نامے پر تبادلہ خیال کیا۔
باہمی دلچسپی کے کلیدی شعبوں میں ملٹری ٹو ملٹری تعاون کو بڑھانا، مشترکہ سرحد پر سیکورٹی میکانزم کو بہتر بنانا اور سرحدی علاقوں کو تجارتی اور اقتصادی رابطوں کے زونز میں تبدیل کرنے کے راستے تلاش کرنا شامل ہیں، جس سے علاقائی استحکام اور خوشحالی میں مدد ملے گی۔
فیلڈ مارشل سید عاصم منیر کی آمد پر پرتپاک استقبال کیا گیا، جس میں ایرانی مسلح افواج کے چاق و چوبند دستے نے گارڈ آف آنر بھی پیش کیا۔
آرمی چیف فیلڈ مارشل نے وزیر اعظم پاکستان کے ہمراہ اس سے قبل ایران کے سپریم لیڈر آیت اللہ سید علی حسینی خامنہ ای اور ایران کے صدر ایچ ای مسعود پیزشکیان سے ملاقات کی۔ فیلڈ مارشل تینوں دوست ممالک کا دورہ کرنے والے وزیراعظم کے وفد کے ساتھ ترکی، ایران اور آذربائیجان کے سرکاری دورے پر ہیں۔
