عامر خان کا 25 سالہ نوجوان کا کردار، وزن کم کرنے کیلئے سخت محنت شروع
ممبئی: بالی وڈ کے سپراسٹار عامر خان نے اپنی نئی اسپورٹس فلم میں 25 سالہ نوجوان کا کردار ادا کرنے کے لیے وزن کم کرنے اور اپنی جسمانی ساخت تبدیل کرنے پر کام شروع کردیا ہے۔ بھارتی میڈیا کے مطابق عامر خان فلم میں اپنے کردار کو حقیقت سے قریب تر دکھانے کے لیے سخت ڈائٹ اور فٹنس پلان پر عمل کر رہے ہیں۔
رپورٹس کے مطابق عامر خان معروف فلمساز آشوتوش گواریکر کے ساتھ ایک نئی اسپورٹس ڈرامہ فلم ’للکار‘ (Lalkaara) میں کام کر رہے ہیں۔ یہ فلم دونوں کی مشہور فلم ’لگان‘ کے 25 سال بعد ہونے والی دوبارہ شراکت بھی ہے۔
بھارتی میڈیا کے مطابق ’للکار‘ کی کہانی 1952 میں بھارت اور پاکستان کے درمیان کھیلی گئی تاریخی ٹیسٹ سیریز کے پس منظر میں تیار کی جا رہی ہے۔ فلم میں کرکٹ، مسابقت، دوستی اور اس دور کے تاریخی حالات کو مرکزی حیثیت دی جائے گی۔
رپورٹس میں کہا گیا ہے کہ عامر خان نے فلم کے لیے اپنے لک اور جسمانی خدوخال پر کام شروع کردیا ہے اور 25 سالہ کردار کو پردے پر مؤثر انداز میں پیش کرنے کے لیے بڑے پیمانے پر وزن کم کرنے کی تیاری کر رہے ہیں۔
عامر خان اس سے قبل بھی مختلف فلمی کرداروں کے لیے اپنے وزن اور جسمانی ساخت میں نمایاں تبدیلیاں کرچکے ہیں، جس کے باعث انہیں بالی وڈ میں کردار کے مطابق جسمانی تبدیلی کے لیے مشہور اداکاروں میں شمار کیا جاتا ہے۔
واضح رہے کہ عامر خان اس وقت 61 برس کے ہیں، تاہم نئی فلم میں انہیں ایک نوجوان کرکٹر کے کردار میں دکھانے کی تیاری کی جا رہی ہے۔