محمد نواز کاڈوپ ٹیسٹ مثبت آنے پر بڑی مشکل میں پھنس گئے
ذرائع کے مطابق یہ ٹیسٹ رواں سال مینز ٹی ٹوئنٹی ورلڈکپ کے دوران کیا گیا تھا
پاکستان کرکٹ میں ایک اہم پیشرفت سامنے آئی ہے جہاں قومی ٹیم کے آل راؤنڈر محمد نواز کو ڈوپ ٹیسٹ مثبت آنے کے بعد باقاعدہ تحقیقات کا سامنا کرنا پڑ رہا ہے۔ اس معاملے نے نہ صرف ان کے کیریئر بلکہ پاکستان کرکٹ کے لیے بھی سوالات کھڑے کر دیے ہیں۔
میڈیا رپورٹس کے مطابق پاکستان کرکٹ بورڈ (پی سی بی) نے اس بات کی تصدیق کی ہے کہ نواز کا ڈوپ ٹیسٹ مثبت آیا ہے۔ یہ اطلاع انہیں انٹرنیشنل کرکٹ کونسل (آئی سی سی) کی جانب سے فراہم کی گئی، جس کے بعد بورڈ نے ضابطہ اخلاق کے مطابق فوری طور پر تحقیقات کا آغاز کر دیا ہے۔ پی سی بی کے ترجمان کا کہنا ہے کہ مکمل تحقیق کے بعد نتائج آئی سی سی کو بھی بھجوا دیے جائیں گے، جس کے بعد حتمی فیصلہ کیا جائے گا۔
ذرائع کے مطابق یہ ڈوپ ٹیسٹ رواں سال ہونے والے آئی سی سی مینز ٹی ٹوئنٹی ورلڈ کپ کے دوران لیا گیا تھا۔ اس ٹورنامنٹ میں محمد نواز نے پاکستان کی نمائندگی کرتے ہوئے تمام سات میچز کھیلے۔ تاہم ان کی کارکردگی نسبتاً محدود رہی، جہاں وہ صرف 15 رنز بنا سکے جبکہ گیندبازی میں 7 وکٹیں حاصل کیں۔
اس صورتحال کا فوری اثر ان کے بین الاقوامی کرکٹ معاہدوں پر بھی پڑا ہے۔ انگلینڈ کے معروف کاؤنٹی کلب سرے کاؤنٹی کرکٹ کلب کے ساتھ ان کا ٹی ٹوئنٹی بلاسٹ کھیلنے کا معاہدہ منسوخ کر دیا گیا ہے۔ یاد رہے کہ انہیں اس ٹورنامنٹ میں شرکت کے لیے این او سی بھی جاری کیا جا چکا تھا اور جلد ہی ان کی شمولیت کا باضابطہ اعلان متوقع تھا، لیکن ڈوپ ٹیسٹ کے نتیجے نے یہ منصوبہ ختم کر دیا۔
دوسری جانب، محمد نواز اس وقت ملتان سلطانز کی نمائندگی کرتے ہوئے پاکستان سپر لیگ میں کھیل رہے ہیں، اور ابھی تک لیگ میں ان کی شرکت جاری ہے۔
یہ معاملہ آئندہ دنوں میں مزید اہمیت اختیار کر سکتا ہے کیونکہ تحقیقات کے نتائج کے بعد ان پر ممکنہ پابندی یا دیگر تادیبی کارروائی کا فیصلہ کیا جائے گا۔
