پاکستان کے ساتھ تجارت جاری ہے، معطل نہیں ہوئی، ایرانی وزارت داخلہ
بعض ہمسایہ ممالک کے ساتھ سرحدی تجارت میں رکاوٹوں کی وجہ لاجسٹک مسائل اور امریکی دباؤ ہے، علی زینوند
تہران: ایران کی وزارت داخلہ کے ترجمان علی زینوند نے کہا ہے کہ پاکستان کے ساتھ دوطرفہ تجارت بغیر کسی معطلی کے جاری ہے، تاہم بعض ہمسایہ ممالک کے ساتھ سرحدی تجارت کو مختلف رکاوٹوں کا سامنا ہے۔
علی زینوند کے مطابق ایران کو بعض پڑوسی ممالک کے ساتھ سرحدی تجارت میں مشکلات کا سامنا ہے، جن کی وجوہات میں معمول کے لاجسٹک مسائل کے ساتھ امریکی دباؤ بھی شامل ہے۔
انہوں نے واضح کیا کہ پاکستان کے ساتھ تجارتی سرگرمیاں معطل نہیں ہوئیں اور دونوں ممالک کے درمیان تجارت جاری ہے۔ تاہم ان کے بقول پاکستان نے بھی بعض تکنیکی اور بنیادی ڈھانچے سے متعلق مسائل کی نشاندہی کی ہے، جنہیں حل کرنے کی ضرورت ہے۔ ان مسائل میں مالیاتی شعبے سے متعلق مشکلات بھی شامل ہیں۔
ایرانی وزارت داخلہ کے ترجمان نے امید ظاہر کی کہ باقی ماندہ معمولی رکاوٹوں کو جلد دور کرلیا جائے گا اور دونوں ممالک کے درمیان تجارتی لین دین اور دیگر تبادلے مکمل طور پر معمول پر آجائیں گے۔
علی زینوند کے بیان سے ظاہر ہوتا ہے کہ ایران اور پاکستان کے درمیان تجارت کو مزید مؤثر بنانے کے لیے سرحدی انتظامات، لاجسٹک سہولتوں اور مالیاتی نظام سے متعلق مسائل کا حل اہمیت رکھتا ہے۔ دونوں ممالک کے درمیان سرحد پار تجارت سرحدی علاقوں کی معیشت اور کاروباری سرگرمیوں کے لیے بھی اہم ہے۔
