امریکی صدر نے ناظم الامور نیٹلی بیکر کو پاکستان میں نیا سفیر نامزد کردیا
وائٹ ہاؤس نے نامزدگی سینیٹ کو بھجوا دی، منظوری کے بعد نیٹلی بیکر باقاعدہ امریکی سفیر کی ذمہ داریاں سنبھالیں گی، اس وقت اسلام آباد میں ناظم الامور کے طور پر خدمات انجام دے رہی ہیں
واشنگٹن: امریکی صدر ڈونلڈ ٹرمپ نے نیٹلی بیکر کو پاکستان میں امریکا کا نیا سفیر نامزد کردیا ہے، جس کے بعد ان کی نامزدگی منظوری کے لیے امریکی سینیٹ کو بھجوا دی گئی ہے۔ سینیٹ سے توثیق کی صورت میں نیٹلی بیکر پاکستان میں امریکا کی باقاعدہ سفیر مقرر ہوجائیں گی۔
وائٹ ہاؤس کے مطابق صدر ڈونلڈ ٹرمپ نے مختلف ممالک میں امریکی سفارتی نمائندوں کی تقرریوں کے سلسلے میں نیٹلی بیکر کو پاکستان کے لیے سفیر نامزد کیا ہے۔ ان کی نامزدگی اب امریکی سینیٹ کے سامنے پیش کی جائے گی، جہاں متعلقہ کارروائی اور منظوری کے بعد وہ باضابطہ طور پر اپنے منصب کا چارج سنبھال سکیں گی۔
نیٹلی بیکر اس وقت پاکستان میں امریکی سفارت خانے کی ناظم الامور (Chargé d’Affaires) کے طور پر خدمات انجام دے رہی ہیں۔ انہوں نے جنوری 2025 میں اسلام آباد میں امریکی سفارت خانے میں اپنی ذمہ داریاں سنبھالی تھیں۔ وہ سفیر کی باقاعدہ تقرری تک پاکستان میں امریکی سفارتی مشن کی سربراہی کر رہی ہیں۔
نیٹلی بیکر کو امریکی محکمہ خارجہ میں طویل سفارتی اور انتظامی تجربہ حاصل ہے۔ وہ اس سے قبل قطر کے دارالحکومت دوحہ میں امریکی سفارت خانے میں ڈپٹی چیف آف مشن کے عہدے پر بھی تعینات رہ چکی ہیں، جہاں انہوں نے امریکا کے سفارتی امور اور دوطرفہ تعلقات کے فروغ میں اہم ذمہ داریاں انجام دیں۔
تعلیمی اعتبار سے نیٹلی بیکر نے امریکا کی معروف پرنسٹن یونیورسٹی سے بیچلرز کی ڈگری حاصل کی، جب کہ ہارورڈ یونیورسٹی کے کینیڈی اسکول آف گورنمنٹ سے پبلک پالیسی میں ماسٹرز کی ڈگری حاصل کی۔ وہ امریکا کی نیشنل ڈیفنس یونیورسٹی کے نیشنل وار کالج کی 2017 کی گریجویٹ بھی ہیں، جہاں انہوں نے قومی سلامتی، دفاعی حکمت عملی اور بین الاقوامی امور سے متعلق اعلیٰ تعلیم حاصل کی۔
نیٹلی بیکر کی بطور امریکی سفیر نامزدگی ایک ایسے وقت میں سامنے آئی ہے جب پاکستان اور امریکا کے درمیان دوطرفہ تعلقات، تجارت، سرمایہ کاری، علاقائی سلامتی اور انسداد دہشت گردی سمیت مختلف شعبوں میں تعاون کو آگے بڑھانے کی کوششیں جاری ہیں۔ سینیٹ کی منظوری کے بعد ان کی باضابطہ تعیناتی سے اسلام آباد اور واشنگٹن کے درمیان سفارتی روابط کو نئی قیادت میسر آئے گی۔
دریں اثنا امریکی صدر ڈونلڈ ٹرمپ نے دیگر ممالک کے لیے بھی نئے سفیروں کی نامزدگیوں کا اعلان کیا ہے۔ وائٹ ہاؤس کے مطابق جیفری کولائر کو متحدہ عرب امارات، سنتھیا کیرشٹ کو سینیگال اور ایان میک کیری کو مالی میں امریکا کا سفیر نامزد کیا گیا ہے۔ ان نامزدگیوں کو بھی منظوری کے لیے امریکی سینیٹ کو بھیجا گیا ہے۔
