موجودہ حالات میں تنازعات کے حل کے لیے سفارت کاری ہی سب سے مؤثر اور قابلِ ترجیح راستہ ہے، ایرانی صدر
ایرانی صدر مسعود پزشکیان نے فرانسیسی صدر ایمانوئل میکرون سے ایک اہم گفتگو کے دوران کہا ہے کہ اسلام آباد میں ہونے والے مذاکرات کسی حتمی نتیجے تک اس لیے نہیں پہنچ سکے کیونکہ امریکا نے سنجیدگی اور نیک نیتی کا مظاہرہ نہیں کیا۔
تفصیلات کے مطابق، ایرانی صدر نے واضح کیا کہ مذاکرات کے دوران امریکا کی جانب سے مسلسل زیادہ سے زیادہ مطالبات پیش کیے گئے، جس کی وجہ سے بات چیت آگے نہیں بڑھ سکی۔ ان کا کہنا تھا کہ کسی بھی کامیاب مذاکرات کے لیے دونوں فریقین کا لچک اور اعتماد کے ساتھ آگے بڑھنا ضروری ہوتا ہے، لیکن امریکی رویہ اس کے برعکس رہا۔
مسعود پزشکیان نے اس موقع پر یورپی ممالک کے کردار پر بھی زور دیا اور کہا کہ یورپ کو چاہیے کہ وہ امریکا کو بین الاقوامی قوانین کی پاسداری پر آمادہ کرے۔ انہوں نے کہا کہ عالمی برادری میں توازن برقرار رکھنے کے لیے یورپ ایک تعمیری اور مثبت کردار ادا کرسکتا ہے۔
ایرانی صدر نے مزید کہا کہ دھمکیوں، دباؤ اور ممکنہ فوجی کارروائیوں سے خطے میں کشیدگی کم ہونے کے بجائے مزید بڑھ سکتی ہے۔ ان کے مطابق، ایسی پالیسیاں نہ صرف خطے کے امن کے لیے نقصان دہ ہیں بلکہ خود امریکا کے لیے بھی نئے مسائل پیدا کرتی ہیں۔
انہوں نے زور دیتے ہوئے کہا کہ موجودہ حالات میں تنازعات کے حل کے لیے سفارت کاری ہی سب سے مؤثر اور قابلِ ترجیح راستہ ہے، اور تمام فریقین کو چاہیے کہ وہ مذاکرات اور بات چیت کے ذریعے مسائل کو حل کرنے کی کوشش کریں۔
