فرحان اختر کی فلم ڈان 3 بڑے بحران کا شکار، شاہ رخ خان اور رنویر سنگھ کی علیحدگی کے اسباب سامنے آ گئے
اس تنازع نے رنویر سنگھ اور زویا اختر کے درمیان پیشہ ورانہ تعلقات کو بھی متاثر کیا، میڈیا رپورٹس
بھارتی معروف ہدایت کار فرحان اختر کی آنے والی فلم ڈان 3 اس وقت شدید بحران کا شکار ہے اور اس کے مستقبل پر بڑے سوالات اٹھنے لگے ہیں۔ بھارتی میڈیا رپورٹس کے مطابق فلم کا آغاز ہی تنازعات اور تاخیر کا شکار رہا، جس نے پروجیکٹ کو مسلسل مشکلات میں ڈال دیا۔
ابتدائی طور پر اس فلم کو اس وقت بڑا دھچکا لگا جب شاہ رخ خان نے 2023 میں اس سے علیحدگی اختیار کر لی۔ ان کی علیحدگی کی بنیادی وجوہات میں طویل تاخیر، اسکرپٹ پر عدم اطمینان اور تخلیقی اختلافات شامل تھے۔ رپورٹس کے مطابق ڈان 2 کے بعد کئی سال تک نئی قسط کی کہانی اور اس کا حتمی خاکہ تیار نہ ہو سکا، جس دوران شاہ رخ خان نے اپنی توجہ بڑے بجٹ کی ایکشن فلموں جیسے پٹھان اور جوان پر مرکوز کر دی۔
شاہ رخ خان کے جانے کے بعد پروڈکشن کمپنی ایکسل انٹرٹینمنٹ نے اس کردار کے لیے رنویر سنگھ کو منتخب کیا۔ ابتدا میں یہ فیصلہ فلم کے لیے نئی امید سمجھا گیا، لیکن جلد ہی صورتحال دوبارہ پیچیدہ ہو گئی۔ بھارتی میڈیا کے مطابق رنویر سنگھ کو فلم کے آخری اسکرپٹ پر تحفظات تھے۔ ان کا مؤقف تھا کہ کہانی اس معیار کی نہیں جس سے وہ ڈان فرنچائز کی وراثت کو آگے بڑھا سکیں، جسے پہلے امیتابھ بچن اور بعد میں شاہ رخ خان نے کامیاب بنایا تھا۔
اسی دوران رنویر سنگھ کی فلم دھریندھر کی کامیابی نے بھی ان کی مصروفیات اور ترجیحات کو تبدیل کیا، جس کے باعث ڈان 3 کی پیش رفت مزید متاثر ہوئی۔ بعد میں رپورٹس میں دعویٰ کیا گیا کہ رنویر سنگھ نے شوٹنگ شروع ہونے سے چند ہفتے قبل ہی فلم چھوڑنے کا فیصلہ کیا، جس سے معاملہ قانونی تنازع تک جا پہنچا۔
بھارتی میڈیا کے مطابق ایکسل انٹرٹینمنٹ نے ابتدائی تیاریوں پر تقریباً 45 کروڑ روپے خرچ کیے، جن میں غیر ملکی لوکیشنز کی بکنگ، ایکشن ٹریننگ اور دیگر پروڈکشن اخراجات شامل تھے۔ پروڈکشن ہاؤس کا مؤقف ہے کہ یہ نقصان رنویر سنگھ کی علیحدگی کے باعث ہوا، اور وہ یہ رقم ان سے وصول کرنے کا مطالبہ کر رہا ہے۔
معاملہ بڑھنے پر فرحان اختر اور رتیش سدھوانی نے فیڈریشن آف ویسٹرن انڈیا سنے ایمپلائز سے رجوع کیا، جس کے بعد ابتدائی طور پر رنویر سنگھ کے خلاف عدم تعاون کی ہدایت جاری کی گئی، تاہم بعد میں اسے واپس لے لیا گیا۔ اس دوران انڈسٹری کی کئی بڑی شخصیات نے دونوں فریقوں کے درمیان مصالحت کی کوشش کی، جن میں عامر خان، سلمان خان، انیل کپور، اشوتوش گواریکر، روہت شیٹی اور کرن جوہر شامل ہیں، مگر کوئی حتمی حل سامنے نہ آ سکا۔
رپورٹس یہ بھی بتاتی ہیں کہ اس تنازع نے رنویر سنگھ اور زویا اختر کے درمیان پیشہ ورانہ تعلقات کو بھی متاثر کیا ہے۔ کہا جا رہا ہے کہ رنویر سنگھ نے معاملہ حل کرنے کے لیے 10 کروڑ روپے کی پیشکش کی تھی، لیکن پروڈکشن ہاؤس نے اسے قبول نہیں کیا۔
اس وقت صورتحال یہ ہے کہ رنویر سنگھ کی علیحدگی کے بعد ایکسل انٹرٹینمنٹ نئے مرکزی اداکار کی تلاش میں ہے، تاہم مسلسل تنازعات، تاخیر اور قانونی پیچیدگیوں کے باعث ڈان 3 کا مستقبل غیر یقینی بنا ہوا ہے۔
