ایرانی فوج کی امریکی ناکہ بندی کے جواب میں بحیرہ احمر سے ہونے والی تجارت بند کرانے دھمکی
تہران: ایران اور امریکہ کے درمیان کشیدگی ایک نئے مرحلے میں داخل ہوتی دکھائی دے رہی ہے، جہاں ایرانی فوج نے سخت ردعمل دیتے ہوئے اہم بین الاقوامی تجارتی راستوں کو متاثر کرنے کی دھمکی دے دی ہے۔
ایرانی حکام کے مطابق امریکی بحریہ کی جانب سے ایرانی سمندری حدود کی ناکہ بندی نہ صرف اشتعال انگیز اقدام ہے بلکہ اسے جنگ بندی معاہدے کی کھلی خلاف ورزی قرار دیا جا رہا ہے۔ ایرانی فوج نے واضح کیا ہے کہ اس اقدام سے خطے میں پہلے سے موجود کشیدگی مزید بڑھ سکتی ہے۔
ایران کی اعلیٰ عسکری قیادت، خاص طور پر خاتم الانبیا سینٹرل ہیڈ کوارٹرز کی جانب سے جاری کردہ بیان میں کہا گیا ہے کہ اگر ایران کی تمام بندرگاہوں کا محاصرہ جاری رکھا گیا تو اس کے سنگین نتائج برآمد ہوں گے۔ بیان میں زور دیا گیا کہ یہ ناکہ بندی ایران کی خودمختاری اور بین الاقوامی قوانین کی بھی خلاف ورزی ہے۔
ایرانی فوج نے خبردار کیا ہے کہ اگر امریکی اقدامات میں کوئی تبدیلی نہ آئی تو ایران کی مسلح افواج بحیرۂ احمر کے راستے ہونے والی عالمی تجارت کو روکنے کے لیے اقدامات کریں گی۔ یہ راستہ عالمی تجارت کے لیے نہایت اہم سمجھا جاتا ہے، اور اس میں رکاوٹ عالمی معیشت پر بھی گہرے اثرات ڈال سکتی ہے۔
فوجی حکام نے مزید کہا کہ صورتحال برقرار رہنے کی صورت میں خلیج فارس اور بحیرۂ عمان کے ذریعے ہونے والی تمام درآمدات اور برآمدات کو بھی متاثر کیا جا سکتا ہے۔ اس کا مطلب یہ ہوگا کہ توانائی کی ترسیل سمیت کئی اہم تجارتی سرگرمیاں شدید متاثر ہوں گی۔
ماہرین کے مطابق اگر یہ تنازع مزید شدت اختیار کرتا ہے تو نہ صرف مشرق وسطیٰ بلکہ پوری دنیا میں اقتصادی اور سیکیورٹی صورتحال غیر مستحکم ہو سکتی ہے۔
