ان دنوں ذہنی تناؤ سے گزر رہی ہوں، ہانیہ عامر کا انکشاف
پاکستان شوبزانڈسٹری کی ورسٹائل اور خوبرو اداکارہ ہانیہ عامر نے انکشاف کرتے ہوئے کہا ہے کہ وہ آج کل لندن میں ذہنی تناؤ سے گزر رہی ہیں۔
فوٹو اینڈ ویڈیو شیئرنگ پلیٹ فارم انسٹاگرام پر اداکارہ نے طویل پوسٹ شیئر کرتے ہوئے ذہنی تناؤ کو حقیقی اور سنگین مسئلہ قرار دیا اور کہا کہ اس مسئلے میں کسی کی مدد لینے میں کوئی شرم نہیں ہے۔
یوں تو ہانیہ عامر رمضان کے آخری عشرے سے لندن میں موجود ہیں تاہم اب انہوں نے اپنی تصویر شیئر کرتے ہوئے بتایا کہ وہ ان دنوں ذہنی تناؤ سے گزر رہی ہیں۔
ہانیہ نے لکھا کہ ہر گزرنے والا دن گزرے ہوئے دن سے الگ ہوتا ہے کبھی اچھا تو کبھی برا، کچھ عرصے سے طبعیت بھی ٹھیک نہیں ہے،
اداکارہ نے لکھا کہ سوشل میڈیا پر میں نے آپ سب کے ساتھ اپنی روز مرہ کی زندگی کے کم و بیش تمام لمحات شیئر کئے ہیں، میں نے کوشش کی ہے کہ جتنا ممکن ہوسکے میں اتنا حقیقت سے قریب تر رہوں لیکن اب مجھے محسوس ہو رہا ہے کہ شاید میں آپ سب کے ساتھ ایماندار نہیں ہوں۔
انہوں نے لکھا کہ فکر کرنے کی ضرورت نہیں ہے، میں اپنی ذہنی صحت یابی کے لیے ہر ممکن کوشش کر رہی ہوں اور آپ سب کو بتانا چاہتی ہوں کہ اگر آپ بھی اپنی زندگی میں اس مشکل وقت سے گزر رہے ہیں کہ جب آپ کو لگے کہ سرنگ کے آخر میں صرف اندھیرا ہے تو کسی کی مدد ضرور طلب کیجئے چاہے وہ آپ کا کوئی پیارا ہو یا کوئی پروفیشنل مددپیشہ ور ہو۔
انہوں نے مزید لکھا کہ میں جانتی ہوں کہ میری طرح آپ میں بہت سے لوگ بھی کبھی نہ کبھی ذہنی صحت کے مسئلے سے دوچار رہے ہوں گے اس لئے ایسی صورت می کسی کی مدد طلب کرنے میں کوئی شرم محسوس کرنے کی بات نہیں ہے آپ کی ذہنی صحت سب سے زیادہ ضروری ہے۔
