عالمی بینک کا پاکستان پر اصلاحات اور ٹیکس آمدن میں اضافے پرعمل درآمد جاری رکھنے پر زور
پائیدار ترقی،غربت میں کمی کیلئے معاشی اصلاحات ضروری ہیں، عمل سے نجی شعبے کی سرمایہ کاری،شرح نمو میں اضافہ ہوگا، ایم ڈی آپریشنز
آئی ایم ایف مشن کا دورۂ پاکستان مکمل ، جس میں مہنگائی میں کمی، ٹیکس آمدن میں اضافے اور اصلاحات جاری رکھنے پر زور
اسلام آباد: ورلڈ بینک نے پاکستان پر اصلاحات پر عمل درآمد جاری رکھنے پر زور دیا ہے۔عالمی بینک نے ایم ڈی آپریشنز کے دو روزہ دورہ پاکستان مکمل ہونے پر اعلامیہ جاری کردیا۔
ایم ڈی آپریشنز ورلڈ بینک نے کہا کہ پائیدار ترقی اور غربت میں کمی کیلئے معاشی اصلاحات ضروری ہیں،عمل سے نجی شعبے کی سرمایہ کاری اور شرح نمو میں اضافہ ہوگا۔
عالمی بینک کی ایم ڈی آپریشنز نے پاکستانی حکام کی طرف سے اصلاحات پر عملدرآمد کو سراہتے ہوئے کہا کہ اصلاحات پر عملدرآمد سے نجی شعبے کی سرمایہ کاری اور شرح نمو میں اضافہ ہو گا۔اعلامئے کے مطابق دورے کے دوران ایم ڈی آپریشنز عالمی بینک نے وزیر اعظم شہباز شریف سے ملاقات کی، ملاقات میں پائیدار معاشی ترقی کیلئے وفاقی اور صوبائی سطح پر اصلاحات کی ضرورت پر اتفاق کیا گیا۔
ایم ڈی آپریشنز عالمی بینک نے کہا کہ پاکستان کی پائیدار ترقی اور غربت میں کمی کیلئے معاشی اصلاحات ضروری ہیں، جامع اصلاحات سے میکرو اکنامک استحکام اور نجی شعبہ کی ترقی میں مدد ملتی ہے، مستقبل میں مالی، ڈیجیٹل، توانائی اور نجی شعبوں میں اصلاحات پر بھی گفتگو کی گئی۔
اعلامئے کے مطابق ایم ڈی آپریشنز عالمی بینک نے خزانہ، اقتصادی امور اور توانائی کے وزراء سے ملاقاتیں کیں، ملاقاتوں میں عالمی بینک کی پاکستان کیساتھ 10 سالہ پارٹنرشپ فریم ورک کے اطلاق پر غور کیا گیا۔ایم ڈی آپریشنز عالمی بینک نے وزیر اعلیٰ سندھ کے ساتھ عالمی بینک کے تعاون سے جاری منصوبوں کا بھی دورہ کیا۔
