ایرانی وزیر خارجہ کا فیلڈ مارشل عاصم منیر سے رابطہ، علاقائی صورتحال اور امن کی کوششوں پر تبادلہ خیال
تہران: ایرانی وزیر خارجہ عباس عراقچی اور پاکستان کے چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نے منگل کو ٹیلی فون پر گفتگو کی، جس میں خطے کی تازہ صورتحال اور باہمی دلچسپی کے امور پر تبادلہ خیال کیا گیا۔
ایرانی وزارت خارجہ کے مطابق دونوں رہنماؤں نے خطے میں ہونے والی حالیہ پیش رفت کا جائزہ لیا اور امن، سلامتی اور علاقائی استحکام کے لیے مشترکہ کوششیں جاری رکھنے کی ضرورت پر زور دیا۔
فریقین نے باہمی تشویش کے امور پر بھی گفتگو کی اور علاقائی استحکام کے لیے مسلسل مشاورت اور مشترکہ اقدامات کی اہمیت کو اجاگر کیا۔
ایرانی وزارت خارجہ کی جانب سے جاری بیان میں گفتگو کی مزید تفصیلات فوری طور پر جاری نہیں کی گئیں۔
واضح رہے کہ جاری علاقائی بحران کے دوران پاکستان نے قطر کے ساتھ مل کر ایران اور امریکا کے درمیان کشیدگی کم کرنے اور مذاکرات کی راہ ہموار کرنے کے لیے اہم سفارتی کردار ادا کیا ہے۔
