پاکستان کے ساتھ جنگ میں شکست کے باوجود بھارت نے سبق نہ سیکھا، ایک اور میزائل کا تجربہ کرلیا
ڈی آر ڈی او کے جاری کردہ بیان میں بتایا گیا کہ یہ تجربہ جمعے کے روز ریاست اڑیسہ میں واقع ڈاکٹر اے پی جے عبدالکلام جزیرے سے کیا گیا
بھارت نے ایک بار پھر اپنے جدید میزائل نظام کا تجربہ کیا ہے، جسے اس کی دفاعی صلاحیتوں میں اہم پیش رفت قرار دیا جا رہا ہے۔
بھارتی دفاعی تحقیقاتی ادارے ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) کے مطابق ملک نے جدید اگنی سیریز کے میزائل کا کامیاب تجربہ کیا ہے۔ یہ میزائل جدید ملٹیپل انڈیپنڈنٹلی ٹارگٹڈ ری انٹری وہیکل (MIRV) ٹیکنالوجی سے لیس ہے، جس کی خاص بات یہ ہے کہ یہ ایک ہی وقت میں متعدد مختلف اہداف کو نشانہ بنانے کی صلاحیت رکھتا ہے۔
ڈی آر ڈی او کے جاری کردہ بیان میں بتایا گیا کہ یہ تجربہ جمعے کے روز ریاست اڑیسہ میں واقع ڈاکٹر اے پی جے عبدالکلام جزیرے سے کیا گیا۔ اس تجربے کے دوران میزائل کو مختلف پے لوڈز کے ساتھ داغا گیا، جنہوں نے کامیابی سے بحرِ ہند کے مختلف حصوں میں موجود مخصوص اہداف کو نشانہ بنایا۔
ادارے کے مطابق اس تجربے کا مقصد میزائل کی درستگی، رینج اور ایک سے زیادہ اہداف کو بیک وقت نشانہ بنانے کی صلاحیت کو جانچنا تھا، اور ابتدائی نتائج کو تسلی بخش قرار دیا گیا ہے۔
بھارتی حکام کے مطابق یہ پیش رفت ملک کے اسٹریٹجک دفاعی نظام کو مزید مضبوط بنانے کی کوششوں کا حصہ ہے، جبکہ اس نوعیت کی ٹیکنالوجی بھارت کو جدید میزائل صلاحیت رکھنے والے ممالک کی صف میں مزید مستحکم کرتی ہے۔
