لارڈز ٹیسٹ: انگلینڈ نے پاکستان کو 194 رنز سے شکست دے کر سیریز جیت لی
لندن: انگلینڈ نے لارڈز ٹیسٹ میں پاکستان کو 194 رنز سے شکست دے کر تین میچوں کی سیریز میں 2-0 کی فیصلہ کن برتری حاصل کرلی۔ 389 رنز کے ہدف کے تعاقب میں قومی ٹیم 194 رنز پر ڈھیر ہوگئی۔
لارڈز ٹیسٹ کے چوتھے روز انگلینڈ نے اپنی دوسری نامکمل اننگز 177 رنز 7 کھلاڑی آؤٹ سے دوبارہ شروع کی، تاہم پاکستانی بولرز نے آخری تین وکٹیں صرف 31 رنز کے اضافے پر حاصل کرلیں اور انگلینڈ کی پوری ٹیم 54.2 اوورز میں 208 رنز بناکر آؤٹ ہوگئی۔
انگلینڈ کی دوسری اننگز میں ڈین لارنس نے نمایاں کارکردگی کا مظاہرہ کرتے ہوئے 70 گیندوں پر 54 رنز بنائے۔ ان کی اننگز میں 8 چوکے اور ایک چھکا شامل تھا۔ ٹیسٹ کرکٹ میں یہ ڈین لارنس کی چھٹی نصف سنچری ہے۔
پاکستان کی جانب سے محمد عباس نے شاندار بولنگ کا مظاہرہ کرتے ہوئے 57 رنز کے عوض 5 وکٹیں حاصل کیں، جبکہ خرم شہزاد اور محمد علی نے 2،2 کھلاڑیوں کو پویلین کی راہ دکھائی۔
36 سالہ محمد عباس کی لارڈز میں یہ پہلی پانچ وکٹیں تھیں۔ وہ تاریخی لارڈز گراؤنڈ میں ایک اننگز میں پانچ وکٹیں لینے والے پاکستان کے ساتویں بولر بھی بن گئے۔
انگلینڈ نے پہلی اننگز میں 290 رنز بنائے تھے، جس کے جواب میں پاکستان کی پوری ٹیم صرف 110 رنز پر آؤٹ ہوگئی تھی۔ انگلینڈ کو پہلی اننگز میں 180 رنز کی برتری حاصل ہوئی، جس کے بعد میزبان ٹیم نے دوسری اننگز میں 208 رنز بناکر پاکستان کے سامنے 389 رنز کا مشکل ہدف رکھا۔
ہدف کے تعاقب میں پاکستان کو ایک بار پھر اوپنر امام الحق کی خدمات حاصل نہ ہوسکیں، جو پنڈلی میں تکلیف کے باعث میدان میں نہیں اترے۔ شان مسعود کے ساتھ اذان اویس نے اننگز کا آغاز کیا۔
پاکستان نے صرف 14 رنز کے مجموعی اسکور پر اذان اویس، عبداللہ شفیق اور کپتان بابر اعظم کی اہم وکٹیں گنوادیں۔ اس مشکل صورتحال میں شان مسعود اور سعود شکیل نے اننگز کو سنبھالا اور چوتھی وکٹ کے لیے 97 رنز کی شراکت قائم کی۔
کھانے کے وقفے کے بعد بارش کے باعث کھیل کچھ دیر کے لیے روکنا پڑا۔ کھیل دوبارہ شروع ہوا تو پاکستان کو 111 رنز کے مجموعی اسکور پر چوتھا نقصان اٹھانا پڑا۔
اولی رابنسن نے شان مسعود کو ایل بی ڈبلیو آؤٹ کیا۔ ابتدائی طور پر امپائر نے انہیں ناٹ آؤٹ قرار دیا تھا، تاہم انگلینڈ نے ریویو لیا تو ٹریکنگ سے واضح ہوگیا کہ گیند وکٹوں سے ٹکرا رہی تھی، جس پر امپائر کو اپنا فیصلہ تبدیل کرنا پڑا۔
شان مسعود 72 گیندوں پر 26 رنز بناکر آؤٹ ہوئے اور سعود شکیل کے ساتھ ان کی 97 رنز کی شراکت اختتام پذیر ہوگئی۔ اس کے بعد وکٹ کیپر محمد رضوان بھی زیادہ دیر وکٹ پر نہ ٹھہر سکے اور صرف 9 رنز بنانے کے بعد اولی رابنسن کا شکار بن گئے۔
چائے کے وقفے کے بعد علی عثمان 16 رنز بناکر جوفرا آرچر کی گیند پر آؤٹ ہوئے، تاہم دوسرے اینڈ پر سعود شکیل مزاحمت جاری رکھے ہوئے تھے۔
سعود شکیل اپنی پانچویں ٹیسٹ سنچری سے صرف 3 رنز کی دوری پر تھے کہ جوش ٹونگ کی گیند پر پل شاٹ کھیلنے کی کوشش میں باؤنڈری پر ہیری بروک کے ہاتھوں کیچ آؤٹ ہوگئے۔ انہوں نے 122 گیندوں پر 97 رنز کی شاندار اننگز کھیلی، جس میں 13 چوکے اور 2 چھکے شامل تھے۔
سعود شکیل کے آؤٹ ہوتے ہی پاکستان کی مزاحمت دم توڑ گئی اور پوری ٹیم 194 رنز پر آؤٹ ہوگئی۔
انگلینڈ کی جانب سے اولی رابنسن نے تباہ کن بولنگ کرتے ہوئے 24 رنز کے عوض 4 وکٹیں حاصل کیں اور پاکستان کی دوسری اننگز کا خاتمہ کردیا۔
یوں انگلینڈ نے لارڈز ٹیسٹ 194 رنز سے جیت کر تین میچوں کی سیریز میں 2-0 کی فیصلہ کن برتری حاصل کرلی۔ پاکستان اب سیریز کا آخری ٹیسٹ جیت کر وائٹ واش سے بچنے کی کوشش کرے گا۔
پاکستان اور انگلینڈ کے درمیان سیریز کا تیسرا اور آخری ٹیسٹ 9 ستمبر سے برمنگھم کے ایجبسٹن کرکٹ گراؤنڈ میں کھیلا جائے گا۔
لارڈز میں کھیلے گئے تین ٹیسٹ میچوں کی سیریز کے دوسرے میچ میں انگلینڈ نے پاکستان کو فتح کے لیے 389 رنز کا مشکل ہدف دے دیا، جبکہ پاکستان کی جانب سے محمد عباس نے شاندار بولنگ کا مظاہرہ کرتے ہوئے میچ میں مجموعی طور پر 9 وکٹیں حاصل کرلیں۔
میچ کے چوتھے روز انگلینڈ نے اپنی دوسری نامکمل اننگز کا آغاز 7 وکٹوں کے نقصان پر 177 رنز سے کیا، تاہم پاکستانی بولرز نے انگلش بیٹنگ لائن کو زیادہ دیر سنبھلنے کا موقع نہ دیا اور پوری ٹیم 208 رنز پر پویلین لوٹ گئی۔
انگلینڈ کی جانب سے ڈین لارنس 54 رنز کے ساتھ ٹاپ اسکورر رہے، جبکہ ہیری بروک نے 34 رنز کی اننگز کھیلی۔ دیگر انگلش بلے باز پاکستانی بولنگ کے سامنے زیادہ مزاحمت نہ کرسکے۔
پاکستان کی جانب سے محمد عباس نے تباہ کن بولنگ کرتے ہوئے دوسری اننگز میں 5 انگلش بلے بازوں کو پویلین کی راہ دکھائی۔ محمد علی اور خرم شہزاد نے بھی عمدہ بولنگ کا مظاہرہ کرتے ہوئے 2،2 وکٹیں حاصل کیں۔
محمد عباس نے انگلینڈ کی پہلی اننگز میں بھی 4 وکٹیں حاصل کی تھیں، یوں انہوں نے میچ میں مجموعی طور پر 9 وکٹیں اپنے نام کرلیں اور پاکستان کی جانب سے نمایاں بولر ثابت ہوئے۔
اس سے قبل انگلینڈ کی ٹیم پہلی اننگز میں 290 رنز بنا کر آؤٹ ہوگئی تھی، جس کے جواب میں پاکستانی بیٹنگ لائن مکمل طور پر ناکام رہی اور پوری ٹیم صرف 110 رنز پر ڈھیر ہوگئی تھی۔
انگلینڈ کی دوسری اننگز 208 رنز پر سمٹنے کے بعد پاکستان کے سامنے 389 رنز کا ہدف ہے، جسے حاصل کرنے کے لیے قومی ٹیم کو نہ صرف مضبوط بیٹنگ کا مظاہرہ کرنا ہوگا بلکہ میچ کے فیصلہ کن مرحلے میں دباؤ کا بھی سامنا ہوگا۔
