دنیا بھر میں خطرات اور آفات کے واقعات میں اضافہ ہو رہا ہے۔ ورلڈ سوشل فورم
کھٹمنڈو میں ورلڈ سوشل فورم کے پینل ڈسکشن میں ہرجیت سنگھ، ڈاکٹر شفقت منیر، رام شرن سیدھائی کا خطاب
کھٹمنڈو میں ورلڈ سوشل فورم کے پینل ڈسکشن میںمقررین نے قدرتی آفات میں کمی (ڈی آر آر)اور موسمیاتی تبدیلی سے مطابقت پذیری (سی سی اے) کے طریقوں کو موسمیاتی سائنس کے ساتھ مربوط کرنے پر زور دیا تاکہ اس بات کو یقینی بنایا جاسکے کہ زیادہ سے زیادہ زندگیاں موسمیاتی آفات سے محفوظ رہیں۔
یہاں جاری پریس ریلیز کے مطابق پاکستان کے معروف تھنک ٹینک سسٹین ایبل ڈویلپمنٹ پالیسی انسٹی ٹیوٹ (ایس ڈی پی آئی) اور آکسفیم کی جانب سے ہفتہ کو کھٹمنڈو میں ورلڈ سوشل فورم میں منعقدہ پینل ڈسکشن سے خطاب کرتے ہوئے مقررین نے کہا کہ موسمیاتی خطرات اور آفات کے واقعات میں اضافہ ہو رہا ہے جس کی وجہ سے کمیونٹیز آفات کے خطرے میں پھنس گئی ہیں اور نقصانات اورمشکلات کا سبب بن رہی ہیں۔
اس موقع پر خطاب کرتے ہوئے عالمی سطح پر معروف ماحولیاتی انصاف کے ماہر ہرجیت سنگھ نے کہا کہ درجہ حرارت موسمیاتی تبدیلی کا فیصلہ کن عنصر ہے جس کے لئے سائنس کا تجزیہ کرنے اور آب و ہوا کے خطرات اور آفات کے خلاف کمیونٹیزکو بہتر طور پر ڈھالنے کے لئے تیار کرنے کی ضرورت ہے۔ انہوں نے انسانی ہمدردی کے شعبے پر زور دیا کہ وہ انسانی ہمدردی کے پروگراموں کو ڈیزائن کرتے وقت مستقبل میں درجہ حرارت میں اضافے کی سطح اورآفات کو ذہن نشین رکھیں۔
انہوں نے کہا کہ یہ کمیونیٹیز موسمیاتی تبدیلی کے اثرات جیسے گلیشیئر پگھلنے، فصلوں کے بدلتے انداز اور پانی کی دستیابی کے بارے میں بہت کچھ جانتی ہیں لیکن وہ نہیں جانتے کہ ایسا کیوں ہو رہا ہے۔
ایس ڈی پی آئی کے ڈپٹی ایگزیکٹو ڈائریکٹر ڈاکٹر شفقت منیر نے کہا کہ آب و ہوا کے خطرات اب شہروں اور قصبوں کو خطرے میں ڈال رہے ہیں اور ڈیزاسٹر رسک ریڈکشن (ڈی آر آر) اور کلائمیٹ چینج ایڈاپٹیشن (سی سی اے) نے دونوں حکمت عملیوں کو لاگو کرتے ہوئے خطرے سے حساس شہری منصوبہ بندی کی ضرورت پر زور دیا ہے۔
انہوں نے کہا کہ تیاری اور پیشگی ڈی آر آر طریقوں سے مقامی سطح پر کمزور آبادیوں کو آنے والی آفات / آب و ہوا کے خطرات سے نمٹنے کے لئے بہتر طور پر مربوط کیا جاسکتا ہے۔ ڈی آر آرسی سی اے کی حکمت عملی اور نفاذ کے منصوبوں سے مقامی سطح پر مزید زندگیوں کو بچانے اور محفوظ رکھنے میں مدد مل سکتی ہے۔
انہوں نے 2013 کے سمندری طوفان ہیان کا حوالہ دیتے ہوئے کہا کہ نامناسب پیشگی انتباہی پیغامات کی وجہ سے کمیونٹیز سونامی کے خلاف تیاری نہیں کر سکیں،کمیونٹیز کو ڈی آر آر پر تربیت دینے کی ضرورت ہے اور قبل از وقت انتباہ پیغام رسانی واضح ہونی چاہئے۔
پروگرام منیجر آرٹس فائونڈیشن سائرہ فلک نے2022 میں سیلاب کے دوران پاکستان میں ہونے والے نقصانات اور خطرات کے بارے میں بتایا۔ انہوں نے خواتین کی حالت زار کا ذکر کرتے ہوئے کہا کہ اس صورتحال کے دوران خواتین کا ذریعہ معاش ختم ہو گیا اور مزید غربت آئی، قدرتی آفات کے خطرات اور تیاریوں پر خواتین کی استعداد کار بڑھانے کی ضرورت ہے۔نیپال سے تعلق رکھنے والے سول سوسائٹی کے ماہر رام شرن سیدھائی کا کہنا ہے کہ آفات غربت پیدا کرتی ہیں،ایک بار آفت کا شکار ہونے کے بعد کمیونٹی کو اثرات سے نکلنے کے لئے وسائل، وقت اور صبر کی ضرورت ہوتی ہے۔
انہوں نے نیپال میں 2015 کے زلزلے کا حوالہ دیتے ہوئے کہا کہ سیاسی قوت ارادی اور استحکام کے لئے زندگیاں بچانے سے متعلق فیصلوں پر دور رس اثرات مرتب ہوتے ہیں۔ انہوں نے مقامی نوجوانوں، پولیس، منتخب نمائندوں اور حکومت جیسے پہلے جواب دہندگان کو تربیت دینے کی ضرورت پر زور دیا۔
