عینا آصف نے شوبز انڈسٹری کے تلخ حقائق بے نقاب کر دئیے
ابتدا میں وہ ان رویوں پر سخت ناراض ہو جاتی تھیں، لیکن وقت کے ساتھ ساتھ انہوں نے خاموشی سے ان حالات کا سامنا کرنا سیکھ لیا ہے۔ اداکارہ
پاکستانی ڈرامہ انڈسٹری کی ابھرتی ہوئی اداکارہ عینا آصف نے حال ہی میں شوبز کی اندرونی دنیا کے ان پہلوؤں پر روشنی ڈالی ہے جو عام طور پر عوام کے سامنے نہیں آتے۔
انہوں نے خاص طور پر شوٹنگ کے دوران سینئر اداکاروں کے رویے اور جونیئر فنکاروں کو پیش آنے والے چیلنجز پر کھل کر بات کی۔
ایک انٹرویو میں عینا آصف نے بتایا کہ بظاہر سینئر اداکاروں کو عزت کی نگاہ سے دیکھا جاتا ہے، لیکن عملی طور پر کئی بار وہ جونیئرز کے لیے غیر آرام دہ ماحول پیدا کر دیتے ہیں۔ ان کے مطابق بعض تجربہ کار فنکار چھوٹی چھوٹی باتوں پر اعتراض یا مذاق کے ذریعے نئے اداکاروں کے اعتماد کو متاثر کر دیتے ہیں۔
اداکارہ نے بتایا کہ یہ صورتحال خاص طور پر جذباتی مناظر کے دوران زیادہ نمایاں ہوتی ہے۔ وہ بتاتی ہیں کہ جب وہ کسی سنجیدہ سین کی تیاری کر رہی ہوتی ہیں تو بعض لوگ اچانک سیٹ چھوڑ دیتے ہیں یا قریب آ کر بلند آواز میں بات چیت شروع کر دیتے ہیں، حتیٰ کہ ڈائریکٹر کے ساتھ غیر سنجیدہ انداز میں گفتگو بھی شروع ہو جاتی ہے، جس سے پورے سیٹ کا ماحول متاثر ہوتا ہے۔
عینا آصف کے مطابق کبھی کبھار ان کے سین کے دوران دیگر اداکار اپنے ڈائیلاگز پوچھنے یا بات کرنے کی وجہ سے ان کی توجہ ہٹا دیتے ہیں، جس سے ان کا سین کا فلو ٹوٹ جاتا ہے۔ وہ وضاحت کرتی ہیں کہ رونے یا غصے جیسے جذباتی مناظر کے لیے ذہنی طور پر تیار ہونے میں وقت لگتا ہے، اور ایسی رکاوٹیں پورے سین کے اثر کو کم کر دیتی ہیں۔
اداکارہ نے کہا کہ ابتدا میں وہ ان رویوں پر سخت ناراض ہو جاتی تھیں، لیکن وقت کے ساتھ ساتھ انہوں نے خاموشی سے ان حالات کا سامنا کرنا سیکھ لیا ہے۔
