بہت جلد برآمدات کو ماہانہ 3 ارب ڈالرز تک بڑھائیں گے، نگران وزیر تجارت
نگران وزیر تجارت گوہر اعجاز نے کہا ہے کہ بہت جلد برآمدات کو ماہانہ 3 ارب ڈالرز تک بڑھائیں گے،ملکی برآمدات کو ماہانہ 8 ارب ڈالرز تک پہنچانا اگلا ہدف ہے۔
وفاقی ادارہ شماریات کی جانب سے تجارتی اعداد و شمار جاری کرنے کے بعد گوہر اعجاز نے ایک بیان میں کہا کہ پاکستان کی برآمدات میں اضافہ جاری ہے۔انہوں نے کہا کہ دسمبر 2023 میں برآمدات 2 ارب 80 کروڑ ڈالرز سے تجاوز کر گئیں۔انہوں نے کہاکہ گزشتہ ماہ برآمدات میں دسمبر 2022 کے مقابلے میں 22 فیصد اضافہ ہوا جبکہ دسمبر 2023 میں تجارتی خسارے میں 40 فیصد کمی ہوئی ہے۔
نگران وزیر تجارت نے کہا کہ بہت جلد برآمدات کو ماہانہ 3 ارب ڈالرز تک بڑھائیں گے، ملکی برآمدات کو ماہانہ 8 ارب ڈالرز تک پہنچانا اگلا ہدف ہے اور اسپیشل انویسٹمنٹ فیسیلیٹیشن کونسل (ایس آئی ایف سی) کے تحت نئی صنعتی پالیسی کے ذریعے برآمدات کے اہداف حاصل کریں گے۔
