امریکی ٹیرف کے معاملے پر وزیراعظم نے سٹیئرنگ کمیٹی اور ورکنگ گروپ تشکیل دے دیا
وزیر خزانہ محمد اورنزیب12 رکنی سٹیئرنگ کمیٹی کے کنونیئر،سیکرٹری تجارت جواد پال ورکنگ گروپ کے کنوینر ہوں گے
ورکنگ گروپ امریکی ٹیرف کا تجزیہ کر کے سفارشات مرتب کرے گا، امریکہ سے اضافی ٹیرف پر مذاکرات کئے جائینگے
اسلام آباد: پاکستانی مصنوعات پر 29فیصد امریکی ٹیرف عائد ہونے کے معاملے پر حکومت نے موثر حکمت عملی تیار کر لی ہے، وزیراعظم شہبازشریف نے اعلی سطح کی سٹیئرنگ کمیٹی اور ورکنگ گروپ قائم کر دیاہے جو امریکہ کے ساتھ اضافی ٹیرف کے معاملے پر مذاکرات کرے گا۔
تفصیلات کے مطابق وزیر خزانہ محمد اورنگزیب 12رکنی سٹیئرنگ کمیٹی کے کنوینر جبکہ سیکرٹری تجارت جواد پال کو ورکنگ گروپ کا کنوینر مقرر کر دیا گیاہے۔ اسٹیئرنگ کمیٹی ٹیرف کے معاملے پر قائم ورکنگ گروپ کی نگرانی کرے گی، 19رکنی ورکنگ گروپ میں متعلقہ سیکرٹریز، کاروباری شخصیات بھی شامل ہیں۔
وزیراعظم کو امریکی ٹیرف کے معاملے پر پیشرفت سے آگاہ رکھا جائے گا۔نوٹیفکیشن کے مطابق کمیٹی کے ممبران میں وفاقی وزرا تجارت و پیٹرولیم، وزیراعظم کے معاون خصوصی برائے صنعت، چیئرمین ایف بی آر، سیکرٹری خارجہ، امریکہ میں پاکستان کے سفیر، ڈبلیو ٹی او میں نمائندے، ڈاکٹر اعجاز نبی، منسٹر ٹریڈ اینڈ انویسٹمنٹ واشنگٹن، سیکرٹری تجارت شامل ہیں۔
اسٹیئرنگ کمیٹی کے ٹرمز آف ریفرنس بھی جاری کر دیئے گئے ہیں۔ دستاویز کے مطابق ورکنگ گروپ امریکی ٹیرف کا تجزیہ کر کے سفارشات مرتب کرے گا، امریکی اضافی ٹیرف سے پاکستانی مصنوعات پر ممکنہ اثرات کا جائزہ لیا جائے گا۔ ورکنگ گروپ بدلتے عالمی تجارتی حالات میں دستیاب مواقع کا بھی تجزیہ کرے گا۔
