ن لیگ اور پیپلزپارٹی فضل الرحمان کیساتھ مسلسل سیاست کر رہی ہیں۔ڈاکٹر فردوس عاشق اعوان

اسلام آباد (نیوز پلس) وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان کا کہنا تھا کہ 2 سیاسی جماعتیں مولانا صاحب کو ذاتی مفادات کی بھینٹ چڑھانا چاہتی ہیں، ان کے عزائم کو بھانپیں، ان کی باہمی نا اتفاقی ثبوت ہے یہ مولانا کا کندھا استعمال کرنا چاہتے ہیں۔سماجی رابطے کی ویب سائٹ پر ٹویٹ کرتے ہوئے انہوں نے کہا کہ سیاسی نبض شناس عوام کی نبض کو کیوں نہیں سمجھ پا رہا؟ عوام میں آپ کی پذیرائی تب ہی ممکن ہے جب آپ اپنی آواز مظلوم کشمیریوں کے حق میں بلند کریں، کشمیر کمیٹی کے چیئرمین کے طور پر پروٹو کول اور مراعات کا قرض ادا کرنے کا وقت آگیا ہے، اپنے الفاظ کے تیروں کا رخ فسطائی مودی کی جانب موڑیں۔ اپنے ٹویٹ میں ڈاکٹرفردوس عاشق اعوان مزید کہا کہ اپوزیشن سیاسی منافقت کی مثال بن چکی ہے، ن لیگ اور پیپلزپارٹی فضل الرحمان کیساتھ مسلسل سیاست کر رہی ہیں، دونوں جماعتیں مولانا کیساتھ کھڑے ہونے کا خطرہ مول نہیں لینا چاہتیں، آپس میں جو سچ نہیں بول سکتے وہ عوام کیساتھ کیا سچ بولیں گے؟۔