ماحولیاتی تبدیلیوں سے نمٹنے کے لیے پاکستان کو عالمی شراکت داروں کے تعاون کی ضرورت ہے۔ وزیرخزانہ

 ماحولیاتی تبدیلیوں سے نمٹنے کے لیے پاکستان کو عالمی شراکت داروں کے تعاون کی ضرورت ہے۔ وزیرخزانہ
آئی ایم ایف سے مذاکرات کامیاب ہیں، جلد اچھی خبر ملے گی،وزیرخزانہ کا تقریب سے خطاب،صحافیوں سے گفتگو

اسلا م آباد:   وزیرخزانہ محمد اورنگزیب کا کہنا ہے کہ ماحولیاتی تبدیلیوں سے نمٹنے کے لیے پاکستان کو ترقیاتی شراکت داروں اور اقوام متحدہ کے تعاون کی ضرورت ہے۔ماحولیاتی تبدیلی پاکستان کیلئے اہم مسئلہ ہے۔ ماحولیاتی تبدیلی پر قابو پانا ہمارے لئے اصل چیلنج ہے۔  پاکستان کے آئی ایم ایف سے جاری مذاکرات کامیاب ہو رہے ہیں، جلد اچھی خبر ملے گی۔

عالمی یومِ گلیشیئرز  پر  تقریب سے خطاب کرتے ہوئے  وزیر خزانہ محمد اورنگزیب نے کہا کہ اقوام متحدہ کی جنرل اسمبلی نے 2022 میں گلیشیئرز سے متعلق قرارداد منظور کی، جس میں پاکستان کے لیے موسمیاتی تبدیلی اور آبادی 2 اہم ترین مسائل قرار دیے گئے اور گلیشیئرز کے تحفظ کو قومی پالیسی میں مرکزی حیثیت دینے پر زور دیا گیا۔

انہوں  نے کہا کہ ماحولیاتی تبدیلیوں سے نمٹنے کے لیے پاکستان کو ترقیاتی شراکت داروں اور اقوام متحدہ کے تعاون کی ضرورت ہے۔ پاکستان میں 3,000 سے زائد گلیشیائی جھیلیں ہیں، جن میں سے  33 انتہائی خطرناک ہیں جب کہ 70 لاکھ سے زائد افراد گلیشیائی جھیلوں کے ممکنہ پھٹنے کے خطرے سے دوچار ہیں۔

وزیر خزانہ کا کہنا تھا کہ  سیلاب سمیت موسمیاتی آفات کے بڑھتے واقعات تشویشناک ہیں۔ پاکستان گلیشیئر پروٹیکشن اینڈ ریزیلینسی اسٹریٹیجی عوامی جائزے کے لیے پیش کر رہے ہیں۔ موسمیاتی خطرات سے نمٹنے کے لیے جامع حکمت عملی کی فوری ضرورت ہے۔

محمد اورنگزیب نے کہا کہ پاکستان میں 2022  کے تباہ کن سیلاب اور بڑھتی آلودگی خطرے سے بہت نقصان ہوا۔  موسمیاتی تبدیلیوں سے نمٹنے کے لیے فوری اقدامات کی ضرورت ہے۔ قومی سطح پر موسمیاتی حکمت عملی کا فریم ورک موجود ہے مگر اس پر  عملدرآمد بڑا چیلنج ہے۔

بعد ازاں وزیر خزانہ نے میڈیا کے نمائندوں سے غیر رسمی بات چیت کرتے ہوئے بتایا کہ بین الاقوامی مالیاتی فنڈ (آئی ایم ایف) کے ساتھ مذاکرات جاری ہیں اور پاکستان آئی ایم ایف کے ساتھ معاشی نظم و ضبط کے ٹارگٹ حاصل کررہا ہے۔

انہوں نے کہا کہ آئی ایم ایف کے ساتھ جاری مذاکرات کی کامیابی میں کوئی بھی رکاوٹ نہیں ہے۔  محمد اورنگزیب نے بتایا کہ بین الاقوامی مالیاتی فنڈ کے ساتھ مذاکرات اپنے آخری مرحلے میں ہیں، جو جلد ہی تکمیل کو پہنچیں گے۔ پاکستان کو آئی ایم ایف کی جانب سے سے جلد خوش خبری ملے گی