ذہانت، قابلیت اور صلاحیت کو غربت یا امارت کی بنیاد پر محدود نہیں کیا جا سکتا۔ وزیراعظم
ونہار طلبہ کو بااختیار بنانے کے عظیم سفر کا آغاز کر رہے ہیں، تعلیم ایسی دولت ہے جسے کوئی چھین نہیں سکتا، وزیراعظم کا اسلام آباد میں تقریب سے خطاب
اسلام آباد: (نیوز پلس) وزیراعظم شہباز شریف نے ملک بھر کے اسکولوں اور مدارس کے پانچ لاکھ ہونہار طلبہ و طالبات کو جدید ٹیکنالوجی اور انٹرنیٹ کی سہولت فراہم کرنے کے منصوبے کا آغاز کرتے ہوئے کہا ہے کہ ذہانت، قابلیت اور صلاحیت کو غربت یا امارت کی بنیاد پر محدود نہیں کیا جا سکتا۔ حکومت نوجوان نسل کو بااختیار بنانے اور انہیں جدید دور کے تقاضوں سے ہم آہنگ کرنے کے لیے تمام ضروری وسائل فراہم کرے گی۔
کنونشن سینٹر اسلام آباد میں پانچ لاکھ طلبہ و طالبات کو کروم بکس اور انٹرنیٹ کی فراہمی کے منصوبے کے اجراء کی تقریب سے خطاب کرتے ہوئے وزیراعظم نے کہا کہ ہونہار نوجوانوں کو بااختیار بنانے کے لیے ایک عظیم سفر کا آغاز کیا جا رہا ہے، جس کا مقصد ملک بھر کے قابل طلبہ کو جدید تعلیمی وسائل تک رسائی فراہم کرنا ہے۔ انہوں نے کہا کہ حکومت دو سال کے عرصے میں پانچ لاکھ طلبہ تک کروم بکس پہنچائے گی تاکہ وہ ڈیجیٹل تعلیم سے استفادہ کرتے ہوئے اپنی صلاحیتوں کو مزید نکھار سکیں۔
وزیراعظم نے تقریب میں شریک غیرملکی مہمانوں کا خیرمقدم کرتے ہوئے کہا کہ نوجوانوں کو بااختیار بنانے کی اس کوشش میں ان کی شرکت خوش آئند ہے۔ ان کا کہنا تھا کہ جدید ٹیکنالوجی سے استفادہ کرنے والے طلبہ مستقبل میں پاکستان کی ترقی، خوشحالی اور معاشی استحکام میں بھرپور کردار ادا کریں گے۔
شہباز شریف نے کہا کہ تعلیم ایسی دولت ہے جسے کوئی چوری نہیں کر سکتا اور یہی وہ ذریعہ ہے جو انسان کو معاشرے میں ممتاز مقام دلاتا ہے۔ انہوں نے اس عزم کا اظہار کیا کہ ملک کے نوجوانوں کو معیاری تعلیم اور جدید ٹیکنالوجی کی سہولتیں فراہم کرنے کے لیے جتنے وسائل درکار ہوں گے، حکومت انہیں فراہم کرنے کی کوشش کرے گی۔
انہوں نے واضح کیا کہ کروم بکس کی تقسیم میں قابلیت اور محنت کو بنیادی اہمیت دی جا رہی ہے۔ اسکولوں اور مدارس کے ہونہار طلبہ و طالبات کو میرٹ کی بنیاد پر جدید آلات فراہم کیے جائیں گے تاکہ تعلیمی مواقع تک رسائی کو وسیع کیا جا سکے اور باصلاحیت نوجوانوں کو آگے بڑھنے کے مساوی مواقع میسر آئیں۔
وزیراعظم کے مطابق اس منصوبے کے تحت طلبہ کو صرف کروم بکس ہی نہیں دی جائیں گی بلکہ انہیں کتابوں اور آلات کی حفاظت کے لیے بیگز اور انٹرنیٹ کی سہولت کے لیے مائی فائی ڈیوائسز بھی فراہم کی جائیں گی۔ ان سہولتوں کی مدد سے طلبہ گھروں میں بیٹھ کر بھی ای لائبریری سے استفادہ کر سکیں گے اور دنیا بھر میں دستیاب تعلیمی مواد تک رسائی حاصل کر سکیں گے۔
شہباز شریف نے امید ظاہر کی کہ جدید ڈیجیٹل آلات اور انٹرنیٹ کی سہولت طلبہ کے لیے علم کے نئے دروازے کھولے گی، ان کی تحقیقی صلاحیتوں میں اضافہ کرے گی اور انہیں عالمی سطح پر ہونے والی علمی و تکنیکی پیش رفت سے منسلک ہونے کا موقع فراہم کرے گی۔ ان کا کہنا تھا کہ پاکستان کے نوجوانوں میں بے پناہ صلاحیتیں موجود ہیں اور مناسب مواقع، رہنمائی اور وسائل کی فراہمی سے وہ مختلف شعبوں میں نمایاں کامیابیاں حاصل کر سکتے ہیں۔
ماضی میں مسلم لیگ (ن) کے دورِ حکومت کا حوالہ دیتے ہوئے وزیراعظم نے کہا کہ نواز شریف کی قیادت میں گلگت بلتستان، آزاد کشمیر سمیت ملک بھر کے چھ لاکھ نوجوانوں میں میرٹ اور قابلیت کی بنیاد پر لیپ ٹاپ تقسیم کیے گئے تھے۔ انہوں نے کہا کہ موجودہ اقدام بھی اسی مقصد کو آگے بڑھانے کی کوشش ہے تاکہ زیادہ سے زیادہ ہونہار طلبہ جدید تعلیمی سہولتوں سے فائدہ اٹھا سکیں۔
حکومت کے اس منصوبے کے تحت اسکولوں اور مدارس کے طلبہ کو ڈیجیٹل وسائل سے منسلک کرنے پر توجہ دی جا رہی ہے۔ کروم بکس، انٹرنیٹ اور ای لائبریری تک رسائی کے ذریعے طلبہ کو نصابی تعلیم کے ساتھ اضافی علمی مواد حاصل کرنے میں مدد مل سکے گی، جبکہ اس اقدام سے ڈیجیٹل تعلیم کے فروغ اور نوجوان نسل کی استعداد کار بڑھانے کی راہ بھی ہموار ہونے کی توقع ہے۔