جونی لیور بھی عمران اشرف کے مداح نکلے
معروف انڈین کامیڈین اور لیجنڈری اداکار جونی لیور نے عمران اشرف کے لئے سرحد پار سے محبت بھرا پیغام بھیجا ہے ۔
جونی لیور نے عمران اشرف کے مشہور کردار’بھولا‘ کی تعریف کرتے ہوئے کہا کہ آپ کی کمال کی اداکاری ہے۔
اُنہوں نے مزید کہا کہ آپ میزبانی بھی کرتے ہیں اور آپ کو میزبانی کرتے ہوئے دیکھ کر تو میں دنگ رہ گیا کیونکہ میزبانی کرنا بہت مشکل کام ہے۔
انہوں نے اپنے پیغام میں عمران اشرف کے ٹیلنٹ کی تعریف کی اور کہا کہ انہوں نے پہلے اپنی اداکاری سے ڈراموں میں اپنا لوہا منوایا اور اب پروگرام اینکر کے طور پر بہترین پرفارمنس دے رہے ہیں۔
جونی نے مزید کہا کہ سب سے بڑی بات یہ ہے کہ آپ کے پروگرام کی ٹیم میں جتنے بھی کامیڈین شامل ہیں سب لیجنڈ ہیں۔
اداکار نے کہا کہ آپ اپنے پروگرام میں آئے مہمانوں کے ٹیلنٹ کو بھی نمایاں کر رہے ہیں جو کہ بہت بڑی بات ہے۔
جونی لیور نے اپنے پیغام کے آخر میں عمران اشرف اور ان کے شو’مذاق رات‘ کی پوری ٹیم کے لیے اپنی نیک خواہشات کا بھی اظہار کیا۔
جونی لیور کا کہنا تھا کہ پروگرام ’’مذاق رات ‘‘ایک بہترین شو کیساتھ ساتھ نئے ٹیلنٹ کو متعارف کرانے کا سبب بھی بن رہا ہے۔
عمران اشرف نے سوشل میڈیا پر شیئر کئے گئے جونی لیور کے ویڈیو پیغام کو اپنے لئے ایک ایوارڈ قرار دیا ہے۔