ایف سی ہیڈ کوارٹر پشاور پر خود کش حملہ ناکام ، 3 دہشت گرد مارے گئے، 3 اہلکار وطن پر قربان
قانون نافذ کرمے والوں نے بروقت جوابی کاروائی کرتے ہوئے ح،لہ ناکام بنایا
خیبر پختونخوا کے دارلحکومت پشاور میں ایف سی ہیڈ کوارٹر پر خود کش حملہ کیا گیا جس میں تینوں دہشت گرد ہلاک ہو گئے۔
پشاور: ( نمائندہ خصوصی) پشاور میں فیڈرل کانسٹیبلری (ایف سی) کے ہیڈ کوارٹر پر دہشت گردوں کے حملے کو ناکام بنا دیا گیا۔ فائرنگ اور دھماکوں کے تبادلے میں تین خودکش حملہ آور مارے گئے جبکہ ایف سی کے تین اہلکار جامِ شہادت نوش کر گئے۔
سی سی پی او پشاور ڈاکٹر میاں سعید کے مطابق حملہ صبح 8 بج کر 10 منٹ پر کیا گیا۔ ایک حملہ آور نے مرکزی گیٹ پر خود کو دھماکے سے اڑا لیا، جبکہ دو حملہ آور ہیڈ کوارٹر کے اندر داخل ہوئے، تاہم اہلکاروں نے بہادری کا مظاہرہ کرتے ہوئے دونوں کو ہلاک کر دیا۔
حملے کے بعد سنہری مسجد روڈ کو ٹریفک کے لیے بند کر کے متبادل راستے صدر روڈ کی طرف موڑ دیے گئے۔ علاقے کو فورسز نے گھیرے میں لے کر کلیئرنس آپریشن شروع کر دیا۔
ڈپٹی کمانڈنٹ فیڈرل کانسٹیبلری جاوید اقبال نے تصدیق کی کہ تینوں حملہ آور مارے گئے ہیں اور جوانوں نے بھرپور جرات کے ساتھ دہشت گردوں کا مقابلہ کیا۔
اسپتال ذرائع کے مطابق واقعے میں 9 افراد زخمی ہوئے جن میں 3 ایف سی اہلکار اور 6 شہری شامل ہیں۔ زخمیوں کو لیڈی ریڈنگ اسپتال منتقل کر دیا گیا ہے جہاں انہیں طبی امداد فراہم کی جا رہی ہے اور ان کی حالت تسلی بخش بتائی جا رہی ہے۔ ایک زخمی کو خیبر ٹیچنگ اسپتال منتقل کیا گیا جہاں ایمرجنسی نافذ کر دی گئی۔
صدر، وزیراعظم اور وزیر داخلہ کی شدید مذمت
صدر مملکت، وزیراعظم اور وفاقی وزیر داخلہ نے ایف سی ہیڈکوارٹر پر خودکش حملے کی شدید الفاظ میں مذمت کی ہے۔
ایوان صدر سے جاری بیان کے مطابق صدر آصف علی زرداری نے شہدا کے لواحقین سے دلی ہمدردی اور زخمیوں کی جلد صحت یابی کے لیے دعا کی ہے۔ انہوں نے کہا کہ حملہ وطنِ عزیز کے خلاف بیرونی پشت پناہی میں سرگرم خارجی دہشت گردوں کی بزدلانہ کارروائی ہے۔
صدر زرداری نے اپنے بیان میں کہا کہ وطنِ عزیز سے بیرونی پشت پناہی میں سرگرم خوارج کی دہشت گردی کا مکمل خاتمہ اولین ترجیح ہے۔ انہوں نے سکیورٹی فورسز اور پولیس کی بروقت اور جرات مندانہ کارروائی کو خراجِ تحسین بھی پیش کیا۔
وزیراعظم شہباز شریف نےا پنے بیان میں کہا کہ سکیورٹی فورسز کی بروقت کارروائی کی بدولت بڑے نقصان سے بچ گئے۔ انہوں نے زخمیوں کو فوری طبی امداد فراہم کرنے کی ہدایت جاری کرتے ہوئے جلد از جلد صحت یابی کی دعا کی۔
شہباز شریف نے کہا کہ واقعے کے ذمہ داران کی جلد از جلد شناخت کر کے کیفر کردار تک پہنچایا جائے۔ پاکستان کی سالمیت پر حملہ کرنے والے دہشتگردوں کے مذموم عزائم کو خاک میں ملا دیں گے۔ حکومت پاکستان ملک سے دہشتگردی کے مکمل خاتمے کے لیے پر عزم ہے۔
دوسری جانب وزیر داخلہ نے بھہ فتنہ الخوارج کا حملہ ناکام بنانے والے ایف سی کے جوانوں کو خراج تحسین پیش کرتے ہوئے اپنے بیان میں کہا کہ ایف سی کے بہادر جوانوں نے حملے کو ناکام بنایا، حملہ اور دہشت گردوں کو جہنم واصل کرنے پر فیڈرل کانسٹیبلری کے جوانوں کی جرآت کو سلام پیش کرتے ہیں۔