2025 دنیا کے گرم ترین سالوں میں شامل، تین سالہ درجہ حرارت پہلی بار 1.5 ڈگری حد سے تجاوز کرنے کے قریب ، کوپرنیکس رپورٹ
یورپی یونین کے ماحولیاتی ادارے کوپرنیکس کلائمیٹ چینج سروس نے اپنی تازہ رپورٹ میں خبردار کیا ہے کہ سال 2025 تاریخ کے گرم ترین سالوں میں شامل ہونے جا رہا ہے۔ ادارے کے مطابق ابتدائی اعداد و شمار سے ظاہر ہوتا ہے کہ 2025، 2023 کے ساتھ مشترکہ طور پر دنیا کا دوسرا گرم ترین سال قرار پا سکتا ہے۔
رپورٹ بتاتی ہے کہ جنوری سے نومبر 2025 کے درمیان عالمی اوسط درجہ حرارت صنعتی دور سے قبل کے معیار کے مقابلے میں 1.48 ڈگری سیلسیس زیادہ ریکارڈ کیا گیا، جو 2023 کے پورے سال کے مساوی ہے۔ اگرچہ امکان ہے کہ 2025 خود 1.5 ڈگری سیلسیس کی حد کو نہ چھوئے، لیکن 2023 سے 2025 تک تین سالہ اوسط درجہ حرارت پہلی بار اس حد سے تجاوز کر سکتا ہے—جو عالمی سطح پر ایک نیا تشویشناک ریکارڈ ہوگا۔
گرم ترین نومبر میں شامل
کوپرنیکس کے مطابق نومبر 2025 عالمی طور پر ریکارڈ کا تیسرا گرم ترین نومبر رہا، جس میں اوسط عالمی درجہ حرارت 14.02 ڈگری سیلسیس ریکارڈ کیا گیا۔ یہ ریکارڈ ساز نومبر 2023 سے صرف 0.2 ڈگری کم ہے۔
ماحولیاتی نظام میں بگاڑ کی واضح علامات
رپورٹ میں مزید بتایا گیا ہے کہ:
- سمندری درجہ حرارت مسلسل غیر معمولی حد تک بلند رہا، جو گلوبل وارمنگ کی رفتار بڑھنے کی علامت ہے۔
- آرکٹک سی آئس اوسط سے 12 فیصد کم جبکہ
انٹارکٹک سی آئس 7 فیصد کم رہی، جو قطبی خطوں میں تیزی سے بدلتے موسمیاتی نمونوں کی نشاندہی کرتا ہے۔
ماہرین کا کہنا ہے کہ یہ تبدیلیاں اب محض اعداد و شمار نہیں رہیں بلکہ شدید موسمیاتی بحران کی براہِ راست علامات بن چکی ہیں۔ ادارے نے خبردار کیا کہ موسمیاتی تباہی کے بڑھتے خطرات کو کم کرنے کا واحد راستہ گرین ہاؤس گیسوں کے اخراج میں فوری اور نمایاں کمی ہے۔
