پاکستان نے معاشی ترقی اور امن کے حوالے سے بھارت کو پیچھے چھوڑ دیا، گلوبل اکنامک گیلپ سروے جاری
گلوبل اکنامک گیلپ سروے کے تازہ ترین اعداد و شمار کے مطابق پاکستان نے اقتصادی حالات اور عالمی امن کے حوالے سے بھارت پر واضح برتری حاصل کرلی ہے۔ 60 ممالک میں کیے گئے اس عالمی سروے کے مطابق پاکستان نے 2026 کے آغاز پر مجموعی طور پر بھارت اور عالمی اوسط سے بہتر کارکردگی دکھائی ہے۔
سروے کے مطابق پاکستان میں 51 فیصد افراد آنے والے سال کے بارے میں پُرامید ہیں، جبکہ مجموعی طور پر نیٹ مثبت رجحان 31 فیصد بنتا ہے۔ اقتصادی حوالے سے 53 فیصد پاکستانیوں کا ماننا ہے کہ 2026 خوشحالی کا سال ثابت ہوگا۔
اعداد و شمار کے مطابق پاکستان میں پُرامیدی کی شرح بھارت کے 39 فیصد کے مقابلے میں کہیں زیادہ ہے، جبکہ یہ عالمی اوسط 24 فیصد سے بھی نمایاں طور پر بلند ہے۔ اسی طرح امن کے حوالے سے بھی پاکستان نے بہتر کارکردگی کا مظاہرہ کیا ہے۔
سروے میں بتایا گیا ہے کہ 52 فیصد پاکستانیوں کو امید ہے کہ دنیا میں امن کی صورتحال بہتر ہوگی، جبکہ بھارت میں یہ شرح صرف 26 فیصد ریکارڈ کی گئی۔ پاکستان میں امن کے حوالے سے امید کی یہ سطح 1994 کے بعد بلند ترین سطحوں میں شمار کی جاتی ہے۔
رپورٹ کے مطابق اس نوعیت کا مثبت رجحان ماضی میں 1990 کی دہائی کے اختتام اور 2010 کی دہائی کے وسط میں بھی دیکھا گیا تھا۔ مجموعی طور پر پاکستان نے تین اہم عالمی پیمانوں—مجموعی امید، اقتصادی خوشحالی اور امن کی توقع—میں عالمی اوسط سے بہتر کارکردگی دکھائی ہے۔
سروے کے مطابق ان میں سے دو پیمانوں میں پاکستان نے بھارت پر سبقت حاصل کی ہے، جس کے نتیجے میں غیر یقینی عالمی حالات کے باوجود پاکستانی عوام 2026 کے حوالے سے پُراعتماد اور پُرامید نظر آتے ہیں۔
گلوبل اکنامک گیلپ سروے پاکستان کی معاشی بہتری اور عالمی امن سے متعلق ایک مثبت اور حوصلہ افزا تصویر پیش کرتا ہے۔
