پاکستان نے سہہ ملکی ٹی ٹوئنٹی سیریز میں سری لنکا کو 7 وکٹوں سے شکست دے دی
راولپنڈی میں کھیلی جانے والی سہ ملکی ٹی ٹوئنٹی سیریز کے اہم میچ میں پاکستان نے سری لنکا کو شاندار انداز میں 7 وکٹوں سے شکست دے کر مسلسل دوسری کامیابی اپنے نام کرلی۔
سری لنکا کی اننگز
ٹاس جیت کر پہلے بیٹنگ کا فیصلہ کرنے والی سری لنکن ٹیم مقررہ 20 اوورز میں 7 وکٹوں کے نقصان پر 128 رنز تک محدود رہی۔
جینتھ لیاناگے 41 رنز بناکر ناٹ آؤٹ رہے، جبکہ کوشل پریرا نے 25 اور کامل مشرا نے 22 رنز کی اننگز کھیلی۔
پاکستان کی جانب سے محمد نواز سب سے کامیاب بولر رہے، جنہوں نے 3 کھلاڑیوں کو پویلین کی راہ دکھائی۔ سلمان مرزا، فہیم اشرف اور ابرار احمد نے ایک ایک وکٹ حاصل کی۔
پاکستان کا جواب
129 رنز کے ہدف کا تعاقب کرتے ہوئے پاکستان نے شاندار بیٹنگ کا مظاہرہ کیا اور میچ 16ویں اوور میں 3 وکٹوں کے نقصان پر جیت لیا۔
اوپنر صاحبزادہ فرحان نے عمدہ کارکردگی دکھاتے ہوئے 45 گیندوں پر 80 رنز کی ناقابلِ شکست اننگز کھیلی، جس میں 5 چھکے اور 6 چوکے شامل تھے۔ صائم ایوب نے 20 جبکہ بابر اعظم نے 16 رنز بناکر ٹیم کی جیت میں حصہ ڈالا۔
سیریز کی صورتحال
سری لنکا کو اس سے قبل اپنے پہلے میچ میں زمبابوے کے ہاتھوں 67 رنز سے شکست ہوئی تھی، جبکہ پاکستان نے زمبابوے کے خلاف اپنے افتتاحی میچ میں 5 وکٹوں سے کامیابی حاصل کی تھی۔
