صحیفہ جبار کا پاکستانی ڈراموں میں ایک جیسے موضوعات اورغیر حقیقی بیاننے پر تشویش کا اظہار
ہمارے ڈراموں کو معاشرے کی مثبت عکاسی کرنی چاہئے ، اداکارہ
پاکستان شوبز انڈسٹری کی معروف ماڈل و اداکارہ صغیفہ جبار خرک نے پاکستانی ڈراموں میں دہرائے جانے والے موضوعات اور غیر حقیقی بیانیے پر تشویش کا اظہار کرتے ہوئے کہا کہ ہمارے ڈراموں کو معاشرے کی مثبت عکاسی کرنی چاہئے
سوشل میڈیا پر جاری ایک بیان میں اداکارہ صحیفہ جبار نے نشاندہی کی کہ ڈراموں میں زبردستی کی شادیوں، گھریلو تشدد، اور خواتین کو ضرورت سے زیادہ میک اپ اور زیورات میں دکھایا جارہا ہے جوکہ حقیقت کے برعکس ہے۔
انہوں نے کہا کہ یہ سب نہ صرف حقیقت سے دور ہے بلکہ معاشرے میں ایک غلط تصور کو فروغ دے دہا ہے۔ انہوں نے سوال اٹھایا کہ آخر یہ غیر حقیقی اور نقصان دہ رجحانات کب ختم ہوں گے، یا کیا یہ سلسلہ اسی طرح ناظرین کے ذہنوں کو متاثر کرتا رہے گا؟
اداکارہ کا کہنا تھا کہ ہمارے ڈراموں کو معاشرے کی مثبت عکاسی کرنی چاہئے نہ کہ ان عناصر کی جو ذہنوں کو مزید خراب کر دیں ۔
صحیفہ جبار نے کہا کہ جب تک تخلیقی ٹیمیں اور پروڈیوسرز نئے حقیقی موضوعات پر مبنی ڈراموں کی طرف نہیں آئیں گے، تب تک ڈرامہ انڈسٹری میں بہتری ممکن نہیں۔
انہوں نے کہا کہ تمام ڈرامے ایک جیسے بن رہے ہیں یا زبردستی شادی ہورہی ہے یا زبردستی محبت کی جارہی ہے یا پھر ہر ساس ظلم کر رہی ہے۔
اداکارہ اس حوالے سے سوال اٹھاتے ہوئے کہنا تھا کہ کیا یہ سب صرف ریٹنگز کے لئے ہو رہا ہے یا ہم معاشرے کو مزید خراب کر رہے ہیں ؟
