دبئی ایئر شو میں جے ایف–17 تھنڈر کے چرچے، طیاروں کیلئے مفاہمتی یاداشت پر دستخط
دبئی ایئر شو 2025 میں پاکستان نے دفاعی تعاون کے میدان میں ایک اہم پیش رفت کرتے ہوئے ایک دوست ملک کے ساتھ جے ایف–17 تھنڈر کی فروخت سے متعلق مفاہمتی یادداشت (ایم او یو) پر دستخط کیے۔ یہ پیش رفت پاکستان کی ایوی ایشن انڈسٹری پر بڑھتے ہوئے بین الاقوامی اعتماد کا واضح ثبوت ہے۔
اس موقع پر سربراہ پاک فضائیہ ائیر چیف مارشل ظہیر احمد بابر سدھو کی مختلف دوست ممالک کے فضائی سربراہان سے اہم اور سلسلہ وار ملاقاتیں بھی ہوئیں۔ انہوں نے متحدہ عرب امارات کے انڈر سیکرٹری برائے دفاع لیفٹیننٹ جنرل پائلٹ ابراہیم ناصر العلاوی اور یو اے ای ائیر فورس اینڈ ائیر ڈیفنس کے کمانڈر میجر جنرل راشد محمد الشمسی سے تفصیلی تبادلۂ خیال کیا۔
ملاقاتوں میں اعلیٰ فضائی تربیت، ابھرتی ہوئی ایرو اسپیس ٹیکنالوجیز میں تعاون، اور آپریشنل ہم آہنگی کو مضبوط بنانے جیسے اہم شعبوں پر گفتگو کی گئی۔ اماراتی عسکری قیادت نے پاک فضائیہ کی جدیدیت، مقامی صلاحیتوں میں اضافے اور تکنیکی ترقی کو سراہتے ہوئے مستقبل میں مشترکہ مشقوں، پیشہ ورانہ تبادلوں اور بین العسکری تعاون کو مزید وسعت دینے کے عزم کا اظہار کیا۔
پاکستان ایئر فورس کا خصوصی دستہ ایئر شو میں شرکت کے لیے یو اے ای میں موجود ہے، جو نہ صرف پاک فضائیہ کی اعلیٰ پیشہ ورانہ مہارت کا اظہار ہے بلکہ عالمی فضائی برادری کے ساتھ اس کے مضبوط تعلقات اور خطے میں امن و استحکام کے عزم کی بھی عکاسی کرتا ہے۔
ایئر شو کے دوران جے ایف–17 تھنڈر بلاک تھری مرکزِ نگاہ رہا۔ دفاعی ماہرین، ہوا بازی کے شائقین اور تجزیہ کاروں نے اس کی جدید ٹیکنالوجی، کم لاگت میں بہترین جنگی خصوصیات اور ثابت شدہ عملی کارکردگی کو بھرپور سراہا۔ مختلف ممالک کی جانب سے طیارے میں بڑھتی ہوئی دلچسپی اس بات کا واضح اشارہ ہے کہ پاکستان کی دفاعی صنعت عالمی سطح پر تیزی سے اپنا مقام مستحکم کر رہی ہے۔
دوست ملک کے ساتھ ایم او یو کا یہ معاہدہ پاکستان کے دفاعی تعاون اور ایرو اسپیس انڈسٹری میں ایک اہم سنگِ میل ہے، جو جے ایف–17 تھنڈر کی عالمی مقبولیت اور پاکستان کی بڑھتی ہوئی تکنیکی و صنعتی صلاحیتوں کا مضبوط اعتراف ہے۔
