بیرون ملک مقیم بارہ ملین سے زائد پاکستانی ہمارا قیمتی اثاثہ ہیں، وزیراعظم
حکومت پاکستان باہر جانے والے افراد کو ہنرمند بنانے کے انتظامات کو ضرروی سمجھتی ہے، شہبازشریف
اسلام آباد: (نمائندہ خصوصی) وزیراعظم محمد شہباز شریف نے کہا ہے کہ بیرون ملک مقیم بارہ ملین سے زائد پاکستانی ہمارا قیمتی اثاثہ ہیں، حکومت پاکستان باہر جانے والے افراد کو ہنرمند بنانے کے انتظامات کو ضرروی سمجھتی ہے۔
عالمی یوم مہاجرین کے موقع اپنے پیغام میں وزیراعظم پاکستان نے کہاکہ آج عالمی یوم مہاجرین پر پاکستان دنیا بھر کے ممالک کے ساتھ مل کر ایسے افراد کے ہمت و حوصلہ، قربانیوں اور بیش قدر خدمات کو خراج عقیدت پیش کرتا ہے جو اپنا ملک چھوڑ کر محنت مزدوری کے لئے دوسرے ممالک جاتے ہیں۔انہوں نے کہاکہ مہاجرین کی مناسبت سے اس سال یہ دن ”میری جدوجہد کی کہانی: ثقافتیں اور ترقی” کے عنوان سے منایا جا رہا ہے۔ یہ موضوع اس روشن حقیقت کو اجاگر کرتا ہے کہ انسانی نقل و حرکت بڑے پیمانے پر باعث برکت ثابت ہوتی ہے۔
انہوں نے کہاکہ مختلف سماجی پس منظر کو اپنے اندر سموئے ہوئے انسانوں کی نقل و حرکت معاشروں کو ثقافتی طور پر مالا مال کرتی ہے،معاشرے میں جدت و تخلیق کو فروغ دیتی ہے۔انہوں نے کہاکہ کثیر الثقافتی معاشرہ جب باہمی تعاون، وقار اور حقوق کے اصولوں پر استوار ہو تو دیر پا ترقی کو آگے بڑھاتا ہے۔ انہوں نے کہاکہ بیرون ملک مقیم بارہ ملین سے زائد پاکستانی ہمارا قیمتی اثاثہ ہیں، سمندر پار پاکستانی اپنے مادر وطن کی صلاحیتوں اور ثقافت کے سفیر اور پاکستان اور دیگر قوموں کے درمیان مضبوط پل ہیں۔انہوں نے کہاکہ ان کی ترسیلات زر، جو سالانہ 38 ارب ڈالر سے زائد ہیں،ملکی معیشت کیلئے مثبت سہارا ہیں اور لاکھوں خاندانوں کا ذریعہ معاش ہیں تاہم ان مہاجرین کی اصل طاقت انکی مہارت، محنت اور عزم میں پوشیدہ ہے۔انہوں نے کہاکہ حکومت پاکستان باہر جانے والے افراد کو ہنرمند بنانے کے انتظامات کو ضرروی سمجھتی ہے کیونکہ آج کی عالمی معیشت میں کامیابی کے لیے صرف فنی مہارت ہی نہیں بلکہ سماجی صلاحیتیں اور زبانوں پر عبور بھی ناگزیر ہے،اسی مقصد کے تحت حکومت فنی و پیشہ ورانہ تربیتی نظام کو بین الاقوامی معیار سے ہم آہنگ کر رہی ہے۔
وزیراعظم نے کہاکہ اس تناظر میں حکومت سماجی تربیت، مختلف مہارتیں، اور غیر ملکی زبانوں کی تعلیم کو فروغ دے رہی ہے تاکہ ہماری افرادی قوت جدید دور کے تقاضوں پر پورا اتر سکے۔انہوں نے کہاکہ پاکستان، یورپی یونین ٹیلنٹ پارٹنرشپ کے علاوہ مختلف ممالک کے ساتھ طے پانے والی مفاہمتی یادداشتوں کے ذریعے سمندر پار پاکستانیوں کے ہنر کو دنیا میں تسلیم کرانے اور انکے حقوق کے تحفظ کے لئے منظم نظام تشکیل دے رہی ہے، مزید برآں، قومی امیگریشن و بہبود پالیسی اور قومی بحالی پالیسی کے مسودے اس امر کو یقینی بناتے ہیں کہ ملک سے باہر جانے والے ہر فرد کے سفر کے تمام مراحل محفوظ، اور باوقار ہوں۔آئیے آج کے دن تجدید عہد کریں کہ ناگزیر حالات میں باہر جانے والوں کو ہنر مند اور انکے لئے مواقع زیادہ محفوظ اور بااختیار بنانے میں اپنا کردار ادا کریں تاکہ مشترکہ ترقی کے سفر کو بار آور بنا سکیں۔
