امریکی میگزین دی ڈپلومیٹ نے پاکستان کو 2025 میں عالمی توجہ کا مرکز قرار دے دیا
پاکستان کی عسکری قیادت نے انتہا پسندی کے خلاف واضح، مضبوط اور دوٹوک ریاستی مؤقف اپنایا
امریکی جریدے دی ڈپلومیٹ نے پاکستان کو سن 2025 میں ایک بار پھر عالمی سیاست اور عسکری مباحث کا مرکز قرار دیتے ہوئے کہا ہے کہ یہ سال پاکستان کے لیے اسٹریٹجک واپسی، عسکری اعتماد اور ریاستی استحکام کا سال ثابت ہوا۔
رپورٹ کے مطابق پاکستان کی عسکری قیادت نے انتہا پسندی کے خلاف واضح، مضبوط اور دوٹوک ریاستی مؤقف اپنایا۔ آرمی چیف کا یہ بیان کہ جہاد کے اعلان کا اختیار صرف ریاست کے پاس ہے، انتہا پسندی کے خلاف ایک تاریخی اور فیصلہ کن سنگِ میل قرار دیا گیا، جس نے ریاستی رٹ کو مضبوط کیا۔
دی ڈپلومیٹ نے لکھا کہ مئی 2025 میں پاکستان اور بھارت کے درمیان ہونے والی فوجی جھڑپوں نے عالمی توجہ حاصل کی، جہاں پاکستانی افواج کی مؤثر کارکردگی نے خطے میں عسکری توازن کو نمایاں کر دیا۔ محدود وسائل کے باوجود پاکستان کے مؤثر دفاعی ردِعمل نے نہ صرف اسٹریٹجک ڈیٹرینس کو مضبوط کیا بلکہ عسکری قیادت کی پیشہ ورانہ صلاحیت کو بھی اجاگر کیا۔
رپورٹ میں کہا گیا کہ بھارت کی عسکری مہم جوئی کا کامیاب جواب دینے کے بعد پاکستان کی فوج عالمی دفاعی ماہرین کی توجہ کا مرکز بن گئی، جس کے نتیجے میں پاکستان دوبارہ عالمی عسکری مباحث میں مرکزی حیثیت اختیار کرنے میں کامیاب ہوا۔
دی ڈپلومیٹ کے مطابق ان پیش رفتوں کے بعد پاکستان اور امریکا کے تعلقات میں نمایاں بہتری دیکھنے میں آئی، جبکہ بھارت کے واشنگٹن سے تعلقات دباؤ کا شکار ہوئے۔ اسی دوران مشرقِ وسطیٰ میں پاکستان کے دفاعی معاہدوں کو اہم اسٹریٹجک کامیابی قرار دیا گیا، خصوصاً سعودی عرب کے ساتھ بڑے دفاعی تعاون نے پاکستان کے علاقائی کردار کو مزید مضبوط کیا۔
رپورٹ میں بتایا گیا کہ پاکستان کے دفاعی سازوسامان کی عالمی سطح پر مانگ میں اضافہ ہوا، جبکہ چین جنگ کے دوران استعمال ہونے والے دفاعی ہتھیاروں کی عملی کارکردگی سے خاصا مطمئن نظر آیا۔ ان حالات میں سی پیک کے دوسرے مرحلے کے لیے عالمی ماحول بھی سازگار ہو گیا۔
افغانستان کے حوالے سے دی ڈپلومیٹ نے کہا کہ پاکستان نے ٹی ٹی پی کے خلاف فیصلہ کن سخت پالیسی اپنائی اور طالبان حکومت پر دباؤ بڑھانے کے لیے مسلسل اور مدلل اقدامات کیے۔ قطر، ترکیہ اور سعودی عرب کو ثالثی میں شامل کر کے سرحد پار دہشت گردی کے خطرات کو عالمی سطح پر مزید نمایاں کیا گیا۔
رپورٹ کے مطابق دہشت گردی کے خلاف پاکستان کو اندرونِ ملک نمایاں کامیابیاں حاصل ہوئیں، مختلف ممالک کے ساتھ تعاون میں اضافہ ہوا اور معاشی مشکلات کے باوجود اصلاحاتی اقدامات پر پیش رفت جاری رہی۔ پی آئی اے کی نجکاری کو دو دہائیوں بعد ایک بڑی پیش رفت اور ممکنہ معاشی ٹرننگ پوائنٹ قرار دیا گیا۔
دی ڈپلومیٹ کے مطابق پاکستان کو موجودہ عالمی فضا سے فائدہ اٹھاتے ہوئے اصلاحات کے ایک نادر موقع سے بھرپور استفادہ کرنا چاہیے۔
