آرمی چیف کا پاک فضائیہ کی آپریشنل بیس کا دورہ، کثیر الملکی مشق انڈس شیلڈ 2024 کا مشاہدہ
جنرل عاصم منیر کو پاک فضائیہ کو جدید بنانے اور سکیورٹی چیلنجز سے نمٹنے کے لئے اقدامات پر بریفنگ دی گئی
آرمی چیف نے پاک فضائیہ کی جنگی تیاریوں اور مختلف جدید ٹیکنالوجیز کے ذریعہ صلاحیتوں کو بہتر بنانے پر اطمینان کا اظہار کیا
آپریشنل کامیابی کیلئے باہمی تعاون ناگزیر ہے،آرمی چیف جنرل عاصم منیر
راولپنڈی:: آرمی چیف جنرل سید عاصم منیر نے پاک فضائیہ کی آپریشنل بیس کا دورہ کیا ہے جہاں انہوں نے کثیر الملکی مشق انڈس شیلڈ 2024 کا مشاہدہ کیا ہے ۔
پاک فوج کے شعبہ تعلقات عامہ (آئی ایس پی آر)کے مطابق پاک فضائیہ کے سربراہ ایئر چیف مارشل ظہیر احمد بابر سندھو نے آرمی چیف کا استقبال کیا، اس موقع پر بحریہ کے سربراہ ایڈمرل نوید اشرف بھی موجود تھے۔آئی ایس پی آر کے مطابق فوجی مشق خطہ کی کثیر ممالک مشق ہے جس میں 24 ممالک کی فضائیہ حصہ لیتی ہے ، مشق کا ماٹیو سٹرونگر وین ٹوگیدر ہے، کثیر الملکی مشق کا مقصد جدید سہولتوں کے ذریعہ پیشہ وارانہ صلاحیتوں اور تربیت کو بہتر بنانا ہے۔
آئی ایس پی آر کے مطابق آرمی چیف نے پاک فضائیہ کی جنگی تیاریوں اور مختلف جدید ٹیکنالوجیز کے ذریعہ صلاحیتوں کو بہتر بنانے پر بھی اطمینان کا اظہار کیا ، آرمی چیف نے مشق آپریشنز، پیشہ وارانہ صلاحیتوں کا مظاہرہ بھی دیکھا۔
آئی ایس پی آر نے کہا کہ آرمی چیف کو پاک فضائیہ کو جدید بنانے اور سکیورٹی چیلنجز سے نمٹنے کے لیے اقدامات پر بریفنگ دی گئی۔آئی ایس پی آر کے مطابق جنرل عاصم منیر نے پی اے ایف فائٹر جیٹ کا فضائی مظاہرہ بھی دیکھا، آرمی چیف ایئر کریو سے بھی ملے اور وطن کی حفاظت کے لیے ان کے عزم اور صلاحیتوں کو سراہا، آرمی چیف نے بین افواج کے تعاون کی اہمیت کو اجاگر کیا۔
اس موقع پر آرمی چیف جنرل عاصم منیر نے کہا کہ آپریشنل کامیابی کیلئے باہمی تعاون ناگزیر ہے، سربراہ فضائیہ نے دورہ کرنے پر آرمی چیف کا شکریہ ادا کرتے ہوئے کہا کہ آرمی چیف کے دورے سے بری اور فضائی افواج میں تعاون ،تربیت اور آپریشنل صلاحیتوں کو فروغ ملے گا۔آ
ئی ایس پی آر کے مطابق سربراہ فضائیہ نے پاک فضائیہ کو جدید ہتھیاروں سے لیس کرنے پر بریفنگ دی ۔ ایئر چیف نے کہا کہ انڈس شیلڈ مشق شریک ممالک کی افواج کی صلاحیتوں کو بڑھانے میں معاون ثابت ہوگی ، مشق سے شریک ممالک کی فوج کو جنگی صلاحیتوں کو بہتر بنانے میں بھی مدد ملے گی ۔
