Newspulse - نیوز پلس
پاکستان، سیاست، کھیل، بزنس، تفریح، تعلیم، صحت، طرز زندگی ... کے بارے میں تازہ ترین خبریں

پاکستان کے آرمی چیف غیر سیاسی اور پروفیشنل ہیں۔کانگریشنل ریسرچ سروس

تحریک انصاف کی حکومت کے فوج سے اچھے مراسم ہیں

واشنگٹن: (نیوز پلس / ما نٹیرنگ ڈیسک) امریکی کانگریس کی رپورٹ کے مطابق پاکستان میں سیکیورٹی اور خارجہ اور پالیسی پر فوج کا اثر و رسوخ نمایاں،لیکن رپورٹ میں یہ بھی کہا گیا کہ ملک کے آرمی چیف غیر سیاسی اور پروفیشنل ہیں۔امریکی قانون سازوں کے لیے کانگریشنل ریسرچ سروس (سی آر ایس) کی تیار کردہ رپورٹ ایسے وقت میں سامنے آئی کہ جب واشنگٹن میں کشمیر کے تنازع سے متعلق خدشات زور پکڑ رہے ہیں۔گزشتہ ہفتے ہی امریکی تھنک ٹینک نے خبردار کیا تھا کہ اگر کشمیر تنازع پر نظر نہ رکھی گئی تو یہ بحران دونوں ممالک کے درمیان ایک اور جنگ کی وجہ بن سکتا ہے اور چونکہ دونوں ممالک کے پاس جوہری ہتھیار ہیں لہٰذا اس کے اثرات سب کے لیے سنگین ہوسکتے ہیں۔واشنگٹن میں موجود پالیسی ساز کا ماننا ہے کہ کشمیر پر پاکستان کس طرح ردِ عمل ظاہر کرے گا اس کا تعین کرنے میں فوج فیصلہ کن کردار ادا کرے گی اور بظاہر اسی وجہ سے سی آر ایس نے فیصلہ کرنے کے عمل میں فوج کے کردار پر امریکی قانون سازوں کے لیے بریفنگ تیار کی۔رپورٹ میں آرمی چیف جنرل قمر جاوید باجوہ کو تین سال کی توسیع ملنے کا ذکر کرتے ہوئے کہا گیا کہ ’جنرل باجوہ کو واضح طور پر پروفیشنل اور غیر سیاسی مانا جاتا ہے‘۔رپورٹ کے مطابق فوج نے 72 سالوں میں 3 سویلین حکومتوں کو ختم کیا تاہم انہوں نے یہ ’واضح یا ضمنی صدارتی احکامات پر کیا‘۔رپورٹ میں یہ بھی کہا گیا کہ وزیراعظم عمران خان نے کرپشن کے خاتمے اور ایسی فلاحی ریاست جو میعاری تعلیم اور صحت کی سہولیات فراہم کرے گی کا نعرہ بلند کر کے ’بہت سے نوجوان، شہری اور مڈل کلاس ووٹرز کو متحرک کیا‘۔تاہم ان کوششوں کا آغاز ملک کے شدید مالی بحران، حکومتی سادگی اور غیر ملکی قرضے لینے کی ضرورت سے ہوا۔سی آر ایس کے مطابق تحریک انصاف کی حکومت کے فوج سے اچھے مراسم ہیں اور ’زیادہ تر تجزیہ کار کی نظر میں پاکستان کی فوجی اسٹیبلشمنٹ کا سیکیورٹی اور خارجہ پالیسز پر غالب اثر رسوخ برقرار ہے‘۔رپورٹ میں کہا گیا کہ گزشتہ برس ہونے والے عام انتخابات نے پاکستان کی سیاست پر 2 دہائیوں سے زائد جاری 2 خاندانی جماعتوں کے غلبے کو ڈرامائی طور پر ختم کردیا اور اس کے مقابلے پاکستان تحریک انصاف نے قومی اسمبلی کی زیادہ نشستیں حاصل کیں‘۔اس سے قبل ایک رپورٹ میں سی آر ایس نے ایک امریکی عہدیدار کے حوالے سے بتایا تھا کہ دہشت گردی، افغانستان، جوہری عدم پھیلاؤ، بھارت، جمہوریت، انسانی حقوق اور اقتصادی ترقی کے حوالے سے امریکا کے وسیع تر مفادات پاکستان میں داؤ پر ہیں۔رپورٹ میں خطے میں نئے جوہری ہتھیاروں کی تنصیب، چین کے ساتھ پاکستان کی قریبی اسٹریٹجک اور اقتصادی پارٹنر شپ پر تحفظات کا اظہار اور اسلام آباد کے ساتھ انسداد دہشت گردی کے سلسلے میں تعاون پر زور دیا تھا۔رپورٹ میں پاکستان کے اقتصادی اور مالی بحران کا جائزہ لیتے ہوئے کہا گیا تھا کہ یہ مہنگائی کی بلند شرح، بے روزگاری اور بعض اوقات خوراک، پانی اور توانائی کی شدید قلت کے ساتھ ایک غریب ملک ہے۔رپورٹ میں کہا گیا کہ ملک کی اقتصادی نمو حالیہ سالوں کے دوران اچھی رہی لیکن آبادی میں اضافے کی رفتار کے حوالے سے کم ہے۔

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More