پاکستان دہشت گردی کے خلاف ہر صورت اپنی لڑائی جاری رکھے گا، ترجمان دفتر خارجہ
وزیر خارجہ اسحاق ڈار نے غیر ملکی سفراکو مکمل سکیورٹی کا یقین دلایا ہے، عافیہ صدیقی کے حوالے سے عدالتی احکامات کے مطابق دفتر خارجہ بھی کرادار ادا کرے گا
پاکستان مسئلہ کشمیر کا اقوام متحدہ کی قراردادوں کے مطابق حل چاہتا ہے،کستان بنگلہ دیش کے ساتھ باہمی تعلقات کو ہمیشہ فروغ دیا ،ممتاززہرا بلوچ کی پریس بریفنگ
اسلام آباد: دفتر خارجہ کی ترجمان ممتاز زہرابلوچ نے کہا ہے کہ پاکستان دہشت گردی کے خلاف ہر صورت اپنی لڑائی جاری رکھے گا ،وزیر خارجہ اسحاق ڈار نے غیر ملکی سفراکو مکمل سکیورٹی کا یقین دلایا ہے، عافیہ صدیقی کے حوالے سے عدالتی احکامات کے مطابق دفتر خارجہ بھی کرادار ادا کرے گا،پاکستان مسئلہ کشمیر کا اقوام متحدہ کی قراردادوں کے مطابق حل چاہتا ہے۔
جمعرات کو ہفتہ وار پریس بریفنگ میں ممتاز زہرا بلوچ نے کہا کہ پاکستانی عوام کی سیکیورٹی کو یقینی بنانے کے لیے دہشت گردی کے خلاف جنگ جاری رہے گی، دہشت گردی کے نتیجے میں سکیورٹی اہلکار بھی شہید ہوتے ہیں۔
انہوں نے کہا کہ وزیر خارجہ اسحاق ڈار نے غیر ملکی سفرا کو پاکستان کی طرف سے مکمل سکیورٹی کا یقین دلایا ہے ، بیرون ممالک میں سفرا کی تعیناتی وفاقی حکومت کا اختیار ہے۔
ترجمان دفتر خارجہ نے وزیراعظم کی جانب سے عافیہ صدیقی کے حوالے سے لکھے گئے کسی خط سے لاعلمی کا اظہار کردیا۔ انہوں نے کہاکہ عافیہ صدیقی کے حوالے سے عدالتی احکامات کے مطابق دفتر خارجہ بھی کرادار ادا کرے گا۔
ترجمان دفتر خارجہ نے کہا کہ پاکستان نے مقبوضہ کشمیر میں بھارت کی جانب سے کشمیریوں کی جائیدادوں کی ضبطگی پر اظہار تشویش کیا ہے، انہوں نے کہاکہ مقبوضہ کشمیر میں حالیہ اقدامات کشمیریوں کی زمین، جائیداد ہڑپ کرنے کی مہم کا حصہ ہے، پاکستان مسئلہ کشمیر کا اقوام متحدہ کی قراردادوں کے مطابق حل چاہتا ہے ۔
ترجمان دفتر خارجہ نے مطالبہ کیا کہ بھارت اپنے ملک میں بنگلہ دیشی سفیر اور سفارتی مشن کی سکیورٹی کو یقینی بنائے،میزبان ملک کہ ذمہ داری ہوتی ہے کہ فارن مشنز کو مکمل سکیورٹی دی جائے۔
ترجمان نے کہا کہ پاکستان بنگلہ دیش کے ساتھ باہمی تعلقات کو ہمیشہ فروغ دیا ہے، پاکستانی ہائی کمیشن کی بنگلہ دیش لیڈر خالدہ ضیا سے ملاقات ممالک کے باہمی تعلقات کے فروغ کے سلسلے میں ہوئی۔
ترجمان دفتر خارجہ نے باور کرایاکہ پاکستان کو شام میں ہونے والی حالیہ پیشرفت پر شدید تشویش ہے، علاقائی امن و استحکام کے لئے شام میں امن ضروری ہے، شام کی سلامتی خود مختاری اور آزادی کا احترام ضروری ہے۔
ترجمان دفتر خارجہ ممتاز زہرا بلوچ نے کہا کہ وزیر اعظم نے رواں ہفتے سعودی عرب کا دورہ کرکے ون واٹر کانفرنس میں شرکت کی، جہاں انہوں نے 6 نکاتی ایجنڈا پیش کیا جس کے تحت آبی مسائل کو حل کیا جاسکتا ہے، انہوں نے کہا کہ سمٹ کے سائیڈ لائن پر وزیراعظم نے سعودی ولی عہد اور فرانس کے صدر سے بھی ملاقات کی۔
ترجمان نے بتایا کہ ای سی او اجلاس کی سائیڈ لائنز پر نائب وزیراعظم اسحق ڈار کی مشہد میں اہم ملاقاتیں ہوئیں جبکہ اسحاق ڈار نے مشہد میں ای سی او کلین انرجی سینٹر کے چارٹر پر دستخط کئے۔ترجمان نے کہا کہ پاک روس بین الحکومتی کمیشن کا 2 روزہ اجلاس ماسکو میں منعقد ہوا جس میں وزیر توانائی اویس احمد لغاری اور ان کے روسی ہم منصب نے اپنے اپنے وفود کی قیادت کی جبکہ اس موقع پر دونوں ممالک نے 8 معاہدوں پر دستخط کئے ۔
انہوں نے کہا کہ اسرائیل کی نہتے فلسطینیوں پر بربریت جاری ہے، علاقائی استحکام کیلئے شام میں امن ناگزیر ہے، اقوام متحدہ کی کل کی قرار داد کو خوش آمدید کہتے ہیں، قرارداد میں فلسطینی علاقوں سے اسرائیلی قبضے کے خاتمے کا کہا گیا۔
