مسیحی برادری ملک کی تعمیر و ترقی کیلئے بھرپور کردار ادا کر رہی ہے, اسپیکر قومی اسمبلی
پاکستان میں بسنے والی اقلیتوں کو مساوی حقوق حاصل ہیں، حضرت عیسیٰ علیہ السلام اللہ تعالیٰ کے برگزیدہ پیغمبر ہیں، جن کی تعلیمات امن، محبت، بھائی چارے اور انسانیت کی خدمت پر مبنی ہیں۔ ان کا یومِ پیدائش ہم سب کے لیے باعثِ سعادت و مسرت ہے۔
اسلام آباد: قومی اسمبلی سیکرٹریٹ کے زیر اہتمام پارلیمنٹ ہاؤس میں کرسمس کی مناسبت سے پروقار تقریب کا انعقاد کیا گیا۔ اس موقع پر اسپیکر قومی اسمبلی سردار ایاز صادق، ڈپٹی اسپیکر قومی اسمبلی سید میر غلام مصطفیٰ شاہ، اسپیکر قانون ساز اسمبلی آزاد جموں و کشمیر چوہدری لطیف اکبر اور قومی اسمبلی کے اعلیٰ افسران نے قومی اسمبلی سیکرٹریٹ میں مسیحی برادری سے تعلق رکھنے والے عملے کے ہمراہ کرسمس کا کیک کاٹا۔
اسپیکر قومی اسمبلی سردار ایاز صادق نے تقریب سے خطاب کرتے ہوئے کہا کہ مسیحی برادری کی خوشیوں میں شریک ہونا ہمارے لیے باعثِ مسرت ہے۔ انہوں نے کہا کہ حضرت عیسیٰ علیہ السلام اللہ تعالیٰ کے برگزیدہ پیغمبر ہیں، جن کی تعلیمات امن، محبت، بھائی چارے اور انسانیت کی خدمت پر مبنی ہیں۔ ان کا یومِ پیدائش ہم سب کے لیے باعثِ سعادت و مسرت ہے۔
سردار ایاز صادق نے مزید کہا کہ پاکستان میں بسنے والی مسیحی برادری سے تعلق رکھنے والے اراکین پارلیمنٹ نے ملک کی تعمیر و ترقی خصوصا طب اور تعلیم کے شعبوں میں گراں قدر خدمات انجام دی ہیں، جو قابلِ ستائش ہیں۔ انہوں نے کہا کہ پاکستان میں بسنے والی اقلیتی برادری کو مساوی حقوق حاصل ہیں اور انہیں اپنے مذہب اور رسم و رواج کے مطابق مذہبی تہوار منانے کی مکمل آزادی حاصل ہے۔
اسپیکر قومی اسمبلی نے کہا کہ آئین پاکستان، ملک میں بسنے والی تمام اقلیتوں کے حقوق کو مکمل تحفظ فراہم کرتا ہے۔انہوں نے مسیحی برادری کو کرسمس کی مبارکباد پیش کی اور ان کی خدمات کو سراہا۔
