فیلڈ نارشل کا بھارتی پروپیگنڈہ مہم کیخلاف پاکستانی نوجوانوں،میڈیا کے ناقابلِ تسخیر کردار کو ’آہنی دیوار‘ قرار
جنرل عاصم منیر کی جانب سے عشائیہ،صدرمملکت، وزیر اعظم سمیت سیاسی وعسکری قیادت کی شرکت
فیلڈ مارشل عاصم منیر نے بھارتی جھوٹے پراپیگنڈے کا بھرپور جواب دینے میں پاکستانی نوجوانوں اور میڈیا کے کردار کو "فولادی دیوار” قرار دیا اور ان کی غیر معمولی خدمات کو خراج تحسین پیش کیا ہے۔
راولپنڈی: فیلڈ مارشل سید عاصم منیر نے کی جانب سے ’معرکہ حق، آپریشن بنیان مرصوص‘ کے دوران سیاسی قیادت کی دانشمندانہ رہنمائی، مسلح افواج کی ثابت قدمی اور پاکستانی عوام کے ناقابل تسخیر جذبے کو خراجِ تحسین پیش کرنے کیلئے عشائیہ دیا گیا جس میں صدر مملکت آصف زرداری اور وزیراعظم شہبازشریف سمیت سیاسی قیادت نے شرکت کی ہے۔
آئی ایس پی آرکی جانب سے جاری بیان کے مطابق عشایئے میں چیئرمین جوائنٹ چیفس آف سٹاف کمیٹی، پاک فضائیہ،پاک بحریہ کے سربراہان و دیگر عسکری حکام،نائب وزیر اعظم اسحاق ڈار، چیئرمین پیپلز پارٹی بلاول بھٹو زرداری، سپیکر قومی اسمبلی سردار ایاز صادق، وفاقی وزراء، تمام صوبائی گورنرز اور وزرائے اعلیٰ نے شرکت کی۔اس موقع پر فیلڈ مارشل سید عاصم منیر نے معرکہ حق کے دوران سیاسی قیادت کی دور اندیشی،پاکستانی سائنسدانوں، انجینئرز اور سفارت کاروں کے پیشہ ورانہ عزم و کردار کو سراہا۔
آئی ایس پی آر کے مطابق فیلڈ مارشل عاصم منیر نے بھارتی پروپیگنڈے کا مقابلہ کرنے پر پاکستانی میڈیا کے کردار کی بھی تعریف کی اور پاکستانی نوجوانوں کے جذبے کو بھی سراہا۔ بیان کے مطابق فیلڈ مارشل نے معرکہ حق کے دوران سیاسی قیادت کی سٹرٹیجک بصیرت پر اظہارِ تشکر کیا۔فیلڈ مارشل نے آپریشن بنیان مرصوص کی کامیابی میں تینوں افواج کے درمیان ہم آہنگی کو بھی سراہا اور بھارتی پروپیگنڈہ مہم کے خلاف پاکستانی نوجوانوں اور میڈیا کے ناقابلِ تسخیر کردار کو ’آہنی دیوار‘ قرار دیا۔
بیان کے مطابق فیلڈ مارشل نے بھارتی پروپیگنڈے کیخلاف نوجوانوں کی بھرپور کاوشوں کو خراجِ تحسین پیش کیا۔آئی ایس پی آر کے مطابق شرکاء نے اس فیصلہ کن دور میں قوم کی رہنمائی کرنے والی مدبرانہ قیادت کو خراجِ تحسین پیش کیا اور افواجِ پاکستان کی جرات و قربانی اور پاکستانی عوام کے پختہ جذبہ حب الوطنی کو سراہا۔
