سائنسدان پروفیسرعمر یاغی ، کیمیا کا نوبیل انعام جیتنے والے کون ہیں ؟
پروفیسر عمر یاغی کو ‘ریٹیکیولر کیمسٹری’ کا بانی سمجھا جاتا ہے
پہلی بار: سعودی شہریت رکھنے والے سائنسدان پروفیسر عمر یاغی کو نوبیل انعام برائے کیمیا مل گیا
اسٹاک ہوم / ریاض / عمان – دنیا کے ممتاز کیمیادان، اردنی نژاد فلسطینی اور سعودی شہریت رکھنے والے پروفیسر عمر مؤنس یاغی کو 2025 کے نوبیل انعام برائے کیمیا سے نوازا گیا ہے۔ سویڈن کی شاہی اکیڈمی آف سائنسز کے مطابق یہ ایوارڈ پروفیسر یاغی کو جاپان کے سوسومو کیتاگاوا اور آسٹریلیا کے رچرڈ روبسن کے ساتھ مشترکہ طور پر دیا گیا ہے۔
یہ انعام ان تینوں سائنسدانوں کو "میٹل آرگینک فریم ورک (MOFs)” کی ایجاد اور اس میں انقلابی تحقیقی خدمات پر دیا گیا ہے۔ یہ ٹیکنالوجی گیسوں کے ذخیرے، توانائی کے تحفظ اور ماحول دوست ایجادات میں سنگِ میل سمجھی جاتی ہے۔
کون ہیں پروفیسر عمر یاغی؟
1965 میں اردن کے دارالحکومت عمان میں پیدا ہونے والے عمر یاغی ایک فلسطینی النسل سائنسدان ہیں، جو اس وقت امریکہ کی یونیورسٹی آف کیلیفورنیا، برکلی میں پروفیسر ہیں۔ وہ برکلی گلوبل سائنسز انسٹیٹیوٹ کے بانی ڈائریکٹر بھی ہیں اور لارنس برکلی نیشنل لیبارٹری میں بھی تحقیق کے شعبے سے وابستہ ہیں۔
انہوں نے 1990 میں یونیورسٹی آف الینوائے سے پی ایچ ڈی کی اور بعد ازاں ہارورڈ یونیورسٹی میں ریسرچ فیلو کے طور پر خدمات انجام دیں۔ وہ ایریزونا، مشی گن اور یو سی ایل اے جیسی جامعات میں بھی پڑھا چکے ہیں۔
سائنس میں انقلابی کردار
پروفیسر عمر یاغی کو "ریٹیکیولر کیمسٹری” کا بانی کہا جاتا ہے۔ ان کی تحقیق نے میٹریلز سائنس، توانائی اور ماحولیات کے میدان میں نئی راہیں کھولیں۔ ان کا کام عالمی سطح پر تسلیم کیا گیا، اور وہ 1998 سے 2008 تک دنیا کے بہترین سائنسدانوں کی فہرست میں دوسرے نمبر پر رہے۔
بین الاقوامی اعزازات
پروفیسر یاغی کو ملنے والے اعزازات میں شامل ہیں:
- شاہ فیصل ایوارڈ (2015)
- مصطفی پرائز برائے نینو سائنس
- البرٹ آئن اسٹائن ورلڈ ایوارڈ آف سائنس
- اردن کا فرسٹ کلاس میڈل آف ایکسیلنس (2017)
ان خدمات کے اعتراف میں سعودی عرب نے 2021 میں انہیں شہریت دی، اور 2024 میں انہیں "نوابغ العرب” ایوارڈ سے بھی نوازا گیا۔
عرب دنیا کے لیے تاریخی لمحہ
یہ پہلا موقع ہے کہ ایک سعودی شہریت رکھنے والے سائنسدان کو کیمیا کے شعبے میں نوبیل انعام ملا ہے۔ یہ نہ صرف پروفیسر یاغی کی ذاتی کامیابی ہے بلکہ عرب دنیا کے لیے بھی ایک تاریخی سنگِ میل ہے، جو سائنسی تحقیق میں خطے کی بڑھتی ہوئی شراکت کا مظہر ہے۔
