جدہ: میڈ اِن پاکستان نمائش کے دوران پاکستان اور سعودی عرب کے درمیان اقتصادی تعاون پر تبادلہ خیال
جدہ: وفاقی وزیر برائے تجارت، جام کمال خان نے “میڈ اِن پاکستان” نمائش اور بزنس فورم کے موقع پر اعلیٰ سعودی حکام سے خصوصی ملاقاتیں کیں، جن میں دوطرفہ اقتصادی تعلقات کو مضبوط بنانے اور تجارت و سرمایہ کاری کے مواقع کو فروغ دینے پر بات چیت کی گئی۔
اس موقع پر جام کمال خان نے جنرل اتھارٹی آف فارن ٹریڈ کے ڈپٹی گورنر، عزت مآب عبدال عزیز السکران سے ملاقات کی، جس میں دونوں رہنماؤں نے پاکستان اور سعودی عرب کے درمیان تجارتی و سرمایہ کاری تعاون کو مزید فروغ دینے کے عزم کا اعادہ کیا۔ عبدالعزیز السکران نے اس کامیاب تجارتی ایونٹ کے انعقاد پر وفاقی وزیر اور حکومت پاکستان کو مبارکباد پیش کی اور اس نمائش کو دونوں ممالک کے درمیان تجارتی تعلقات کو فروغ دینے کے لیے ایک اہم سنگ میل قرار دیا۔
اسی طرح، وفاقی وزیر برائے تجارت کی سعودی چیمبرز آف فیڈریشن کے چیئرمین، حسن مجیب الہویضی سے بھی اہم ملاقات ہوئی، جس میں دونوں ممالک کے درمیان ادارہ جاتی شراکت داری اور تجارتی تعلقات کو مزید مستحکم کرنے پر گفتگو کی گئی۔
اس موقع پر، جام کمال خان نے سعودی چیمبر کے کردار کو سراہتے ہوئے کہا کہ دوطرفہ تجارتی تعلقات کو بڑھانے کے لیے مزید کاروباری و تجارتی سرگرمیاں (B2B) منظم کی جانی چاہئیں، تاکہ نجی شعبے کے اسٹیک ہولڈرز کو ایک دوسرے کے قریب لایا جا سکے اور تجارتی مواقع کو مزید وسعت دی جا سکے۔
“میڈ اِن پاکستان” نمائش اور بزنس فورم جو 5 سے 7 فروری 2025 تک جدہ انٹرنیشنل ایگزیبیشن اینڈ کنونشن سینٹر میں جاری ہے، پاکستانی صنعتکاروں اور سعودی سرمایہ کاروں کو ایک پلیٹ فارم مہیا کر رہا ہے، جہاں وہ پاکستان کی صنعتی صلاحیتوں کو اجاگر کر سکتے ہیں اور مختلف شعبوں میں دوطرفہ تعاون کے مواقع تلاش کر سکتے ہیں۔
