Newspulse - نیوز پلس
پاکستان، سیاست، کھیل، بزنس، تفریح، تعلیم، صحت، طرز زندگی ... کے بارے میں تازہ ترین خبریں

العزیزیہ ریفرنس کیس:نیب کا میاں نواز شریف کی بیرون ملک علاج اور مستقل ضمانت کی مخالفت

میاں نواز شریف کو مخصوص مدت کیلئے ضمانت دی جا سکتی ہے۔نیب

اسلام آباد (نیوز پلس) العزیزیہ ریفرنس میں قومی احتساب بیورو نے میاں نواز شریف کی بیرون ملک علاج اور مستقل ضمانت کی مخالفت کر دی۔ نیب کا کہنا تھا کہ میاں نواز شریف کو مخصوص مدت کیلئے ضمانت دی جا سکتی ہے۔تفصیلات کے مطابق اسلام آباد ہائی کورٹ میں العزیزیہ ریفرنس میں سابق وزیر اعظم نواز شریف کی طبی بنیادوں پر ضمانت پر رہائی کی درخواست پر سماعت ہوئی، وزیر اعلیٰ پنجاب عثمان بزدار عدالت میں پیش ہوئے اور کہا کہ نواز شریف سروسز ہسپتال لاہور میں علاج سے مطمئن ہیں، ان کا پنجاب حکومت پر اظہار اعتماد ہے۔جسٹس عامر فاروق نے سردار عثمان بزدار سے کہا کہ آپ کو بلانے کا مقصد تمام بیمار قیدیوں کیلئے اقدامات کرنا ہیں۔ جس پر وزیراعلی پنجاب نے کہا کہ میں خود بھی وکیل ہوں، ایک سال میں 8 جیلوں کا دورہ کیا، پنجاب کی جیلوں میں اصلاحات کا پیکج صوبائی کابینہ میں ہے۔ عدالت نے وزیراعلی عثمان بزدار سے جیلوں کے حوالے سے رپورٹ لے کر انہیں واپس جانے کی اجازت دے دی۔میڈیکل بورڈ نے میاں نواز شریف کی حالت کو انتہائی تشویشناک قرار دیا اور کہا نواز شریف کو دل، گردوں کاعارضہ ہے، نواز شریف کو پلیٹ لیٹس کا مسئلہ درپیش ہے۔ ڈاکٹرز کا کہنا تھا کہ نواز شریف کی پلیٹ لیٹس کی تعداد بہت کم ہے، دوران علاج نواز شریف کو ہارٹ اٹیک کی شکایت ہوئی، عام حالت میں پلیٹ لیٹس کی تعداد ایک لاکھ سے زائد ہونی چاہیئے۔ڈاکٹر نے کہا ایک بیماری کا حل تلاش کرتے ہیں تو دوسری سامنے آ جاتی ہے، انتہائی پروفیشنل ڈاکٹرز پر مشتمل بورڈ بنایا گیا، نواز شریف کے پلیٹ لیٹس اس وقت 30 ہزار ہیں، نواز شریف کی حالت خطرے میں ہے، پلیٹ لیٹس بڑھانے کی دوا دی تو نواز شریف کو ہارٹ اٹیک ہوگیا۔عدالت نے ڈاکٹر عدنان سے استفسار کیا آپ ذاتی معالج ہیں، رپورٹ پڑھی؟ جس پر نواز شریف کے ذاتی معالج نے کہا نواز شریف کی حالت انتہائی تشویشناک ہے، وہ زندگی کی جنگ لڑ رہے ہیں، خدشہ ہے انہیں کھو نہ دیں، نواز شریف کو جان بچانے والی ادویات دی جا رہی ہیں، بورڈ نے نواز شریف کی باڈی سکین کا فیصلہ کیا ہے، نواز شریف کو پہلے کبھی اس حالت میں نہیں دیکھا۔ذاتی معالج ڈاکٹر عدنان نے عدالت کو بتایا کہ پلیٹ لیٹس کی تعداد میں کمی کی وجوہات معلوم نہیں ہوسکیں، 20 سال سے نواز شریف کا معالج ہوں، ان کی حالت تشویشناک ہے، نواز شریف دل، گردے، اسٹروک، شریانوں کے سکڑنے کی بیماریوں کا شکار ہیں۔جسٹس عامر فاروق نے استفسار کیا اگر نواز شریف کچھ ماہ میں ٹھیک ہو جاتے ہیں تو سزا کا کیا ہوگا؟ جس پر وکیل نے کہا نیب کے پاس اختیار ہوگا، ضمانت منسوخی کیلئے درخواست دے سکتے ہیں۔ جسٹس عامر فاروق نے کہا آرٹیکل 401 کے تحت ایگزیکٹو خود ایسے کام کیوں نہیں کرتا؟ کیا اس میں کوئی رکاوٹ ہے؟ حکومت کے پاس بیمار قیدی کیلئے اختیارات موجود ہیں۔نیب نے موقف اپنایا کہ نواز شریف کی صحت پر ڈاکٹرز کی رائے محترم، وہی ایکسپرٹ ہیں، ڈاکٹرز نے یہ نہیں کہا نواز شریف کا علاج پاکستان میں ممکن نہیں۔ جس پر عدالت نے کہا اس کا ذکر ہی نہیں ہوا، آپ صرف بیماری پر بات کریں۔ نیب نے کہا سپریم کورٹ نے علاج کیلئے 6 ہفتے کی سزا معطل کی تھی، سپریم کورٹ نے سزا معطلی کے وقت کچھ پیرا میٹرز طے کیے تھے، حکومت نے کہا اگر بیرون ملک سے ڈاکٹر درکار ہوا تو وہ بھی منگوایا جائے گا۔ عدالت نے ایڈووکیٹ جنرل اسلام آباد کو روسٹرم پر بلالیا اور پوچھا ایسی صورت میں اسلام آباد کے قیدیوں کا فیصلہ کون کرتا ہے؟ جس پر ایڈووکیٹ جنرل نے کہا صوبائی حکومت ہی اسلام آباد کے قیدیوں پر فیصلہ کرتی ہے، اسلام آباد میں جیل ہے نہ ہی قوانین۔ جسٹس محسن اختر کیانی نے کہا اسلام آباد میں جیل بنانے کا کسی نے سوچا ہی نہیں، اب جیل بن رہی ہے تو یہ مسئلہ حل ہو جائے گا، اسلام آباد میں جیل جلدی بنائیں تا کہ جلد آباد ہو جائے۔

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More